მომხმარებელთა ქცევა მუდმივად იცვლება, იხვეწება, თუმცა ერთი რამ არასდროს შეიცვლება — ადამიანები ენდობიან ადამიანებს. ეს სრული ჭეშმარიტებაა B2C ბაზრებისთვის ისევე, როგორც B2B ინდუსტრიებისთვის. ამ ყველაფერს კვლევებიც მკაფიოდ ადასტურებს.

„StoryTap“-ის კვლევის თანახმად, მომხმარებელთა 88.5% რეალური მომხმარებლის მიმოხილვას უფრო ენდობა, ვიდრე ინფლუენსერისას. მიუხედავად იმისა, რომ ინფლუენსერ მარკეტინგი ძალიან ეფექტურია, რეალურ მომხმარებელზე სანდო არაფერია.

ონლაინ მყიდველების 98% ონლაინ პროდუქტის ან მომსხურების შეძენამდე ონლაინ მიმოხილვებს აკვირდება, ხოლო 66% პროდუქტს ამ მიმოხილვის წაკითხვის შემდეგ ყიდულობს. ამიტომაც, თითოეული ბრენდი უნდა ცდილობდეს მომხმარებლის მიერ წარმოებული კონტენტის (UGC) წახალისებასა და მის მარკეტინგულ სტრატეგიაში ინტეგრირებას.

სწორედ ამ თემას მიმოვიხილავთ სტატიაშიც.

ვინ არის ბრენდის ადვოკატი?

ბრენდის ადვოკატი არის ადამიანი, რომელიც დადებითად საუბრობს მასზე. ისინი კომპანიას ბრენდის მესიჯის გავრცელებაში ეხმარებიან, მათ შორის სოციალურ მედია არხებში, ფორუმებსა და ივენთებში. ძირითად შემთხვევებში ეს არის არსებული მომხმარებელი, რომელიც ბრენდის პროდუქტით/მომსახურებით ძალიან კმაყოფილია.

ამ ინდივიდებს შეძენილი აქვთ კომპანიის პროდუქტი და მას აქტიურად უწევენ რეკომენდაციას საკუთარ მეგობრებსა თუ ნაცნობებში. ფაქტობრივად, ეს word-of-mouth მარკეტინგის იდეალია. როდესაც მომხმარებელი ბრენდის ადვოკატი ხდება, ის მას საკუთარი სურვილით არეკლამებს (ინფლუენსერისგან განსხვავებით). ეს კი მომხმარებლის მიერ წარმოებულ კონტენტს კიდევ უფრო სანდოს ხდის.

ამით იმის თქმას არ ვცდილობთ, რომ ინფლუენსერი ვერ იქნება ნამდვილი ბრენდის ადვოკატი. პირიქით, სანდო ინფლუენსერისთვის საკუთარი პროდუქტის გაგზავნა ყოველგვარი ვალდებულებების გარეშე ერთ-ერთი საუკეთესო საშუალებაა. ამგვარად, აუდიტორიას ესმის, რომ ეს არ არის პროდუქტის დაკვეთილი მიმოხილვა. ამასთანავე, თქვენ ამ კონტენტის გამოყენება საკუთარი კამპანიებისთვისაც შეგიძლიათ.

ბრენდის ადვოკატი და ინფლუენსერ მარკეტინგი „earned” მედიის ტიპებს მიეკუთვნებიან და მათ საკმაო უკუგების მოტანა შეუძლიათ ბრენდებისთვის. ინფლუენსერ მარკეტინგში, სტატისტიკურად, მარკეტოლოგები ყოველ დახარჯულ $1-ზე, $18-ის უკუგებას იღებენ. შესაბამისად, ინფლუენსერ მარკეტინგში ინვესტირება ძალიან კარგი იდეაა.

ასევე გაითვალისწინეთ, ბრენდის ადვოკატი არ არის აუცილებლად მომხმარებელი — ის შეიძლება თქვენი დასაქმებულიც კი იყოს.

რას მოიცავს მომხმარებელთა ადვოკატურის პროგრამა?

ეს პროგრამა არის სტრატეგია, რომელიც ბრენდის ადვოკატების მოზიდვას ემსახურება. ის ასევე მოიცავს მომხმარებელთა დაჯილდოებასა და წახალისებას დადებითი გამოცდილების გაზიარებისთვის.

გარკვეულწილად, ეს ინფლუენსერ მარკეტინგსაც წააგავს, თუმცა მისგან განსხვავებით აქ იმ რეალურ მომხმარებელს აჯილდოვებთ, რომელიც თქვენს პროდუქტს უკვე იცნობს და უყვარს. თქვენ კონკრეტულ ადამიანს პატივისცემის ნიშნად რაიმე ხელშესახებს ჩუქნით. ეს შეიძლება იყოს უფასო მაისური, კუპონი ან რაიმე ტიპის აბონიმენტი. ასეთი პროგრამის მთავარი ხიბლი სწორედ ის არის, რომ ის მუშაობს, როგორც B2B ბაზრისთვის, ასევე B2C ინდუსტრიისთვისაც.

სად შეიძლება ჩასვათ მომხმარებლის მიერ წარმოებული კონტენტი თქვენს მარკეტინგულ სტრატეგიაში?

მომხმარებლის მიერ წარმოებული კონტენტი თითქმის ყველგან ეფექტურია. ბრენდები მას ყველა არხში, ყველანაირი ფორმატით იყენებენ და მყიდველების ყურადღების არეალშიც ექცევიან.

მაგალითად, თუ თქვენ სარეკლამო ძაბრის ზედა ნაწილისთვის ამუშავებთ პოსტს, სადაც გავრცელებულ პრობლემაზე საუბრობთ, შეგიძლიათ მას კმაყოფილი მომხმარებლის ციტატა დაურთოთ და აჩვენოთ პოტენციურ მომხმარებელს, თუ როგორ მიიღო მან სასურველი შედეგი თქვენი პროდუქტის დახმარებით. ეს ასახავს რეალურ მაგალითს და ადამიანებს აჩვენებს, თუ როგორ შეგიძლიათ თქვენ მათი პრობლემის გადაჭრა.

შემდეგ, ძაბრის შუა ნაწილისთვის, შეგიძლიათ მომხმარებელთა მიმოხილვის ამსახველი სურათები გამოიყენოთ და აუხსნათ პოტენციურ მომხმარებლებს, თუ რატომ აგირჩიეს მათ თქვენ და არა კონკურენტები. იქვე შეგიძლიათ დაურთოთ პროდუქტის შედარებებიც.

რაც შეეხება ძაბრის ბოლოს, აქ „Case study”-ს ან მნიშვნელოვანი მომენტების გაზიარება შეგიძლიათ. იმ მომენტების, რომლებიც თქვენს პროდუქტსა და მომსახურებასთანაა დაკავშირებული. მაგალითად, აჩვენეთ მომხმარებელი, რომელმაც გადალახა ჭარბი წონის პრობლემა თქვენი პროდუქტის დახმარებით. "Case study"-ს გადაქცევა ბლოგ პოსტად ასევე შესანიშნავი საშუალებაა მომხმარებლის გამოცდილების აღსაწერად.

ბლოგებთან ერთად, თქვენი UGC კონტენტის გამოყენება იმეილ კამპანიებში, ფასიან რეკლამებში, სოციალურ მედია პოსტებსა და ვიდეოებშიც შეგიძლიათ.

როგორ ვიპოვოთ ბრენდის პოტენციური ადვოკატები?

თითოეული მომხმარებლის ბრენდის ადვოკატად გადაქცევა იდეალური იქნებოდა, თუმცა ამის მოხდენის ალბათობა ძალიან დაბალია და ეს სრულიად ნორმალურიც არის. თითოეულ ასეთ ადამიანს შეუძლია, ასობით პოტენციურ მომხმარებელს მისწვდეს ერთი განხილვითაც კი. შესაბამისად, მათი მცირე რაოდენობაც საკმარისია ცნობადობის გასაზრდელად.

ამასთანავე, თქვენი პროგრამა აუცილებლად უნდა მოიაზრებდეს მომხმარებლებისთვის შეფასების დატოვების თხოვნასაც. მაგრამ ბრენდის ამბასადორებისა და ადვოკატების მოსაძებნად სხვა გზებიც არსებობს.

ეცადეთ მომხმარებელთან დაკავშირება და გაიგეთ, შეძლებენ თუ არა ისინი სოციალურ მედია გვერდებზე მიმოხილვის დატოვებას. პოტენციური ადვოკატების პოვნა შესაძლოა ბლოგის კომენტარებში, სოციალურ მედიაში ან პოდკასტებზეც შეძლოთ.

ზოგიერთი ბრენდი საკმაოდ თამამია და ცდილობს, კონკურენტის უკმაყოფილო მომხმარებლებსაც დაუკავშირდეს და მათ უფასოდ შესთავაზოს რაიმე მიმოხილვის სანაცვლოდ. ამან შესაძლოა იმუშაოს, თუ თქვენი პროდუქტი მათთვის დამაკმაყოფილებელია.

როგორ ვაქციოთ მომხმარებელი ბრენდის ადვოკატად?

თქვენი მომხმარებელთა ბაზა სავსეა პოტენციური ადვოკატებით. მხოლოდ თქვენზეა დამოკიდებული, შეძლებთ თუ არა მათ დაკმაყოფილებას და ისე მოხიბვლას, რომ მათ თქვენზე საუბარი დაიწყონ. თუმცა, უნდა აღინიშნოს, რომ თხოვნის გარეშე ეს იშვიათად ხდება.

სწორედ ამიტომ არის კრიტიკულად მნიშვნელოვანი მიმოხილვაზე თხოვნის გაგზავნა მას შემდეგ, რაც მომხმარებელი პროდუქტს მოიხმარს. ეს პერიოდი შეიძლება მოიცავდეს რამდენიმე კვირასაც. ასეთი თხოვნის გაგზავნაზე არ უნდა იჩქაროთ, მომხმარებელს საკმარისი დრო უნდა ჰქონდეს. მაგალითად, თუ თქვენ წონის დასაკლები პროდუქტი გაქვთ, რომელსაც 30 დღე სჭირდება შედეგის მისაღებად, მომხმარებელს 33-ე დღიდან დაუკავშირდით.

თუმცა, ნუ დაჯდებით უბრალოდ და ნუ დაელოდებით, რომ თქვენი პროდუქტი შესანიშნავ შედეგებს მოუტანს მომხმარებელს. შეგიძლიათ, მათთვის უფრო დამაკმაყოფილებელი გამოცდილებაც შექმნათ და მეტად დაეხმაროთ. მაგალითად, ამ შემთხვევაში შეგიძლიათ:

1. შექმნათ კამპანია, სადაც მათ პროდუქტის ყოველდღიური მოხმარებისკენ მოუწოდებთ;
2. შესთავაზოთ რჩევები;
3. გაუკეთოთ ფასდაკლებები მონათესავე პროდუქტებზე;
4. შექმნათ ლოიალობის პროგრამა განმეორებითი შესყიდვებისთვის;
5. სთხოვოთ მათ უკუკავშირი პროდუქტის დასახვეწად;
6. გაუგზავნოთ რაიმე საჩუქარი 30 დღის შემდეგ;
7. დაუკავშირდეთ მათ 30 დღის შემდეგ და მისცეთ გამოსადეგი რჩევა.

ამ ყველაფრის მიზანი მომხმარებელთან ურთიერთობის გამყარება, იდეების მოსმენა და უკუკავშირის მიღებაა. გარდა ამისა, ამით მათზე ზრუნვასა და პატივისცემას გამოხატავთ.

როგორ წავახალისოთ მომხმარებლების მიერ კონტენტის შექმნა

ლოიალური მომხმარებლების მიერ საკუთარი ისტორიების გაზიარება დღეს ყველაზე მარტივია. მილენიალებისა და თაობა Z-ის უმრავლესობა ციფრულ სამყაროში საკმაოდ დიდ დროს ატარებს და სხვადასხვა პროდუქტის შეფასებებსაც ხშირად ტოვებს. შესაბამისად, უბრალოდ თხოვნაც შესაძლოა საკმარისი აღმოჩნდეს.

გარდა ამისა, თქვენი შანსების გასაზრდელად შეგიძლიათ, მათ უფასო საჩუქრები შესთავაზოთ — ვაუჩერები ან სასაჩუქრე ბარათი. მიზანი გულწრფელი შეფასების მიღებაა, რომელიც თქვენ შესაძლებლობად უნდა გარდაქმნათ.

გამოეხმაურეთ უარყოფით შეფასებებსაც და არ დატოვოთ უყურადღებოდ თქვენივე შეცდომები. მიუდექით ასეთ შემთხვევებს, როგორც შესაძლებლობებს პროდუქტის ან მომსახურების დასახვეწად. გამოსწორების შემდეგ, დაუკავშირდით ამ მომხმარებელს და გაუგზავნეთ უკეთესი პროდუქტი უფასოდ. დიდი ალბათობით, ისინი საკუთარ შეფასებას გადააკეთებენ და უკეთეს ვერსიასაც დაწერენ.

მთავარია, მომხმარებლისთვის შეფასების დატოვება უმარტივესი იყოს. მაგალითად, ეს შეიძლება მოხდეს იმეილსა და სოციალურ მედია პოსტებში, სადაც პირდაპირი ბმული გექნებათ მითითებული. რაც უფრო ნაკლები საფეხურის გავლა დასჭირდებათ მათ, მით უფრო მეტ შეფასებასაც მიიღებთ.

თუ სოციალურ მედიაში საკუთარი ბრენდის გარეკლამება და პოპულარიზაცია გსურთ, მაშინ ეცადეთ ეს პროცესი თამაშს დაამსაგვსოთ. მოითხოვოთ სურათების გაზიარება, კომენტარები ან სთორები თქვენი პროდუქციით. ამის სანაცვლოდ კი, მომხმარებელს საჩუქარი შესთავაზეთ.

ნამდვილად მუშაობს მომხმარებლის მიერ წარმოებული კონტენტი?

ეს დამოკიდებულია იმაზე, თუ როგორ ითხოვთ მას. სწორად განხორციელებისას, მას მარკეტინგული კამპანიების გაძლიერება ნამდვილად შეუძლია. ზოგიერთი მარკეტოლოგი მას ინფლუენსერ მარკეტინგზე ეფექტურადაც მიიჩნევს. ხშირ შემთხვევაში ასეთი კამპანიებიდან მიღებული ROI (უკუგება ინვესტიციაზე) უფრო მაღალია.

ყურადღება: უბრალოდ დარწმუნდით, რომ UGC კონტენტის გამოყენებისას, მასზე ნებართვა უკვე გაქვთ.

როგორ იყენებენ კომპანიები მომხმარებლის მიერ წარმოებულ კონტენტს?

კომპანიები UGC კონტენტს ყველა პლატფორმაზე იყენებენ, იქნება ეს სოციალური მედია თუ საიტი. თქვენც იგივე უნდა გააკეთოთ. თუმცა, თუ მცირედი შთაგონება არ გაწყენდათ, მაშინ სხვადასხვა მაგალითებს გადავხედოთ.

UGC კონტენტის მაგალითები

პირველი მაგალითისთვის შეგვიძლია Custom Neon გამოვიყენოთ, რომელიც სახელიდან გამომდინარე, ნეონის სანათებს ამზადებს. ისინი მომხმარებლის მიერ წარმოებულ კონტენტს სოციალური მედიიდან აგროვებენ და საკუთარ არხებში, მომხმარებლის მიერ დატოვებული შეფასებებითაც ავრცელებენ.

Dingle Dangle მაგალითად, UGC კონტენტს მეილებიდან აგროვებს და მათ საკუთარ ინსტაგრამზე აქვეყნებს.

ნუ დაელოდებით UGC კონტენტის გამოჩენას, წაახალისეთ მისი შექმნა

მომხმარებლის მიერ წარმოებული კონტენტი არ მიეკუთვნება იმ კონტენტის ტიპს, რომელიც შემთხვევით ჩნდება. აქ მთავარი შესაბამისი სტრატეგიის შემუშავებაა. მოძებნეთ გზები მომხმარებლის ჩასართავად — გამოკითხვებით, შეჯიბრებით და სხვადასხვა სტიმულებით.

შექმენით ისეთი სიტუაცია, სადაც თქვენც და მომხმარებელიც გამარჯვებული დარჩებით. თუ ამას ვერ მოახერხებთ, მაშინ ეს გაკვეთილად აქციეთ. გახსოვდეთ, კარგი პროდუქტის გარეშე, კმაყოფილი მომხმარებლის იდეაც უნდა დაივიწყოთ.

ეტაპობრივად, როდესაც UGC კონტენტის წარმოება გახშირდება, თქვენ სათანადო ბაზას დააგროვებთ კონტენტ მარკეტინგისა და გაყიდვების კამპანიებისთვის.

ასევე დაგაინტერესებთ:

UGC - მომხმარებლის მიერ წარმოებული კონტენტი

რა არის მუდმივი, ანუ Always-On მარკეტინგი?

5 გზა ბრენდის ლოიალობის ასამაღლებლად