რა უნდა ვიცოდეთ ფეისბუქის სარეკლამო ძაბრზე?
Facebook ძაბრი ლიდების და გაყიდვების გენერირებისთვის ერთ-ერთი ყველაზე ძლიერი და ეფექტური მარკეტინგული სტრატეგიაა, რომელიც ეხმარება თქვენს ბიზნესს განვითარებაში და ზრდის მარკეტინგის ROI-ს (უკუგება ჩადებულ ინვესტიციებზე).
საკამათო ნამდვილად არ არის ის ფაქტი, რომ Facebook Ads ლიდებისა და გაყიდვების გენერირებისთვის უბადლო საშუალებაა. მიუხედავად ამისა, იმის შანსი, რომ მომხმარებელი პირველი დანახვის თანავე შეიძენს თქვენს პროდუქტს ან მომსახურებას, ძალიან მცირეა.
იმისათვის, რომ მომხმარებელი თქვენს მთავარ შეთავაზებას დათანხმდეს, რამდენიმე მნიშვნელოვანი წერტილი, ეტაპი გჭირდებათ. სწორედ ამისთვის არის ფეისბუქის სარეკლამო ძაბრი, რომელიც გეხმარებათ მომხმარებელი ერთი ეტაპიდან, მეორეზე გადაიყვანოთ.
სამწუხაროდ, მარკეტოლოგების ნაწილი ხშირად ფეისბუქ ძაბრის პოტენციალს სათანადოდ ვერ აფასებენ და აიგნორებენ, ვინაიდან ის საკმაოდ კომპლექსური ჩანს. გარდა ამისა, ეტაპების სიმრავლის გამო, შესაძლოა ხშირად დამაბნეველიც აღმოჩნდეს.
ამის თავიდან ასარიდებლად გთავაზობთ გზებს, თუ როგორ შეიძლება იდეალური ფიუსბუქ ძაბრის შექმნა და მისი საშუალებით კონვერსიისა და ROI-ს მაქსიმიზაცია.
რას წარმოადგენს ფეისბუქის სარეკლამო ძაბრი
ფეისბუქის სარეკლამო ძაბრი, სარეკლამო კამპანიათა ერთობლიობაა, რომელიც მომხმარებელს სხვადასხვა ეტაპზე ამოგზაურებს, დაწყებული სრულიად უცხო ადამიანიდან, დამთავრებული რეალური მომხმარებლით.
ტექნიკურად ფეისბუქის სარეკლამო ძაბრი მოიცავს რამდენიმე ტიპის კამპანიას სხვადასხვა სახის რეკლამებით, რომელიც სწორ აუდიტორიას სათანადო ღირებულებას სთავაზობს, რა თქმა უნდა, შესაფერის დროს.
ფეისბუქის სარეკლამო ძაბრი სამი მთავარი ეტაპისგან შედგება:
- ცნობადობა - ძაბრის სათავე (TOFU)
- განხილვა - ძაბრის შუა ნაწილი (MOFU)
- კონვერსია/გადაწყვეტილება - ძაბრის ძირი (BOFU)
ამ ყველაფერს გაყიდვის შემდგომი ეტაპიც მოსდევს, რომელიც ახლად შეძენილი მომხმარებლის ლოიალურ მომხმარებლად ქცევაზეა ორიენტირებული. ეს არა მარტო თქვენი მომხმარებლის სიცოცხლისუნარიანობის ღირებულებას ზრდის, არამედ რადიკალურად ზრდის თქვენს სარეკლამო მომგებიანობასაც.
ეს წარმოადგენს ფეისბუქ სარეკლამო ძაბრის 3+1 დიზაინს.
Facebook Ads საშუალებას გაძლევთ სამიზნე აუდიტორიას ნებისმიერ საფეხურზე დაუკავშირდეთ:
- უცნობი („ცივი“ აუდიტორია) - ადამიანები, ვინც არ იცნობენ თქვენს ბრედნს და შესაბამისად, პროდუქტსა თუ მომსახურებას
- პოტენციური მომხმარებლები („თბილი აუდიტორია“) - ადამიანები, რომლებიც გიცნობენ და გამოხატული აქვთ გარკვეულ ინტერესი თქვენი პროდუქტის ან სერვისის მიმართ
- ლიდები („ცხელი“ აუდიტორია) - დაინტერესებული ადამიანები, რომლებმაც გაგიზიარეს საკუთარი საკონტაქტო ინფორმაცია და სურთ, უფრო მეტი შეიტყონ თქვენ შესახებ.
- მომხმარებლები - თქვენი პროდუქტის მყიდველები
- ლოიალური პრომოუტერები - კმაყოფილი მომხმარებლები, რომლებსაც უყვართ თქვენი პროდუქტი/მომსახურება იმდენად, რომ მზად არიან, მას რეკომენდაცია საკუთარ მეგობრებთანაც გაუწიონ (უფასოდ).
ფეისბუქი ერთ-ერთი ყველაზე იშვიათი მარკეტინგული პლატფორმაა, რომელიც სრულყოფილი ძაბრის შექმნაში გვეხმარება.
ამის განსახორციელებლად შეგიძლიათ, ერთი ეტაპიდან მომდევნო ეტაპზე გადასულ მომხმარებელს განსახვავებული რეკლამა აჩვენოთ. ისეთი, რომელიც ამ ეტაპისთვის რელევანტური იქნება.
ფეისბუქის სარეკლამო ძაბრს შეუძლია, საგრძნობლად გაზარდოს თქვენი კონვერსიის მაჩვენებელი, გაყიდვები და რეკლამისთვის ზედმეტი თანხების დაზოგვაშიც დაგეხმაროთ.
მის გარეშე დიდი ალბათობით თქვენს სარეკლამო ბიუჯეტს უბრალოდ გაფლანგავთ, ვინაიდან რეკლამებს თქვენი პროდუქტის შესახებ ცივ აუდიტორიას გაუზიარებთ.
ბევრი მარკეტოლოგი იწყებს Facebook Ads მოსინჯვას, გაუშვებს მას გარკვეული პერიოდით და შემდეგ აჩერებს, როდესაც ხედავენ, რომ მომხმარებელთა მოზიდვის ხარჯები საკმაოდ მაღალი, ხოლო კონვერსიის მაჩვენებელი უსიამოვნოდ დაბალია.
პრობლემა იმაში მდგომარეობს, რომ ისინი რეკლამას პირდაპირ გაყიდვებისთვის იყენებენ და ივიწყებენ იმას, რომ სრულიად უცნობ ადამიანებს უკავშირდებიან. შესაბამისად, მიზნები საკმაოდ შეუსაბამობაში მოდის, ვინაიდან მომხმარებელთა უმრავლესობა პროდუქტის შესასყიდად მზად არ არის.
რატომ არ არიან მომხმარებლები მზად შეიძინონ პროდუქტი, მხოლოდ ერთი რეკლამის ნახვის შემდეგ?
მომხმარებელთა უმრავლესობა მხოლოდ ერთი რეკლამის ნახვის შემდეგ თქვენი პროდუქტის შესაძენად მზად არ იქნება. ეს იმიტომ, რომ თქვენი ბრენდი მათ პირველად შეამჩნიეს. ისინი ჯერ კიდევ არ გიცნობენ, არ გენდობიან და ბრენდზეც მაინცდამაინც არ დარდობენ.
შეიძლება საკმაოდ მაცდუნებელი იყოს ერთი რეკლამით პროდუქტის გაყიდვა, თუმცა ბუნებრივია, პროცესი ასე არ მუშაობს.
მიუხედავად იმისა, რომ გაყიდვები ყველა ბიზნესის საბოლოო მიზანია, ძალიან ცოტა ადამიანი შეიძენს თქვენს პროდუქტს პირველი რეკლამის ნახვის შემდეგ. ღირებული კონვერსიები ძირითადად მომხმარებლის სხვადასხვა ეტაპზე ინტერაქციით ხდება.
ადამიანები, რომლებიც ფეისბუქსა თუ ინსტაგრამზე ატარებენ დროს, აქტიურად არ ეძებენ რაიმე პროდუქტს შესაძენად. ნაცვლად ამისა, ისინი ეხმაურებიან მეგობრებს, ეცნობიან სიახლეებს და უყურებენ სახალისო ვიდეოებს.
ამ პროცესში თქვენი რეკლამები ხელის შემლელი ფაქტორი ხდება. სწორედ ამიტომ გჭირდებათ ისეთი რეკლამა, რომელიც მომხმარებლის ყურადღებას მიიქცევს და „სქროლვას“ შეაწყვეტინებს.
თუმცა, ასეთ შემთხვევაშიც, თუ მომხმარებლის ყურადღების მიპყრობა მოახერხეთ, ეს მაინც არ ნიშნავს იმას, რომ მომხმარებელი დაუყონებლივ შეიძენს თქვენს პროდუქტს. გახსოვდეთ, რომ ისინი მაინც არ გიცნობენ და ჯერ არ გენდობიან იმდენად, რომ მათი შრომით გამომუშავებული ფული თქვენთან დახარჯონ.
ამის მიზეზები ადამიანის ფუნდამენტურ ფსიქოლოგიაშია ჩაბუდებული.
წარმოიდგინეთ, რომ წვეულებაზე ხვდებით გოგოს, რომელიც მოგწონთ.
თქვენ არ ეცდებით პირველივე დანახვაზე მის კოცნას, ყოველ შემთხვევაში, ამის დიდი იმედი გვაქვს.
ასეთ შემთხვევაში თქვენ აუცილებლად მტკიცე უარს ან სახეში მწარე სილასაც კი მიიღებთ.
შანსების მოსაპოვებლად საჭიროა, მისი დაინტერესება გამოიწვიოთ. ის უნდა მოხიბლოთ.
ამიტომ, პირველ რიგში, მიიქციეთ მისი ყურადღება, გააცანით საკუთარი თავი და წამოიწყეთ დიალოგი.
შემდეგ, თუ ის ინტერესს გამოხატავს, გამოართვით მას ნომერი და საბოლოოდ, თუ ბოლომდე მოახერხეთ მისი დაინტერესება და მოხიბვლა, შესაძლოა კოცნაც დაიმსახუროთ.
ჩვენს შემთხვევაში, ჩაანაცვლეთ წვეულება ფეისბუქით, პაემნები სარეკლამო კამპანიებით და კოცნა გაყიდვებით და ნახავთ, როგორ გაიმართება ფეისბუქის სარეკლამო ძაბრი.
ანალოგია პირველივე კოცნის შემდეგაც (გაყიდვების) გრძელდება. თუ ეს საქმე კარგად გამოგდით (ვგულისხმობთ კოცნას), მაშინ ის თქვენ შესახებ თავის მეგობრებთან გაუთავებლად ილაპარაკებს და თუ შემდგომ ეტაპებზეც დაანახებთ თქვენს ფასს, მაშინ ის სამუდამოდ თქვენი ერთგული დარჩება.
კარგი, გვეყო რომანტიკა! ნება მოგვეცით, ახლა გაჩვენოთ, თუ როგორ შეიძლება იდეალური ფეისბუქ სარეკლამო ძაბრის აგება და მისი ბიზნესზე მორგება.
როგორ შევქმნათ იდეალური ფეისბუქის სარეკლამო ძაბრი
იდეალური ფეისბუქ სარეკლამო ძაბრის შექმნის პროცესი დაკავშირებულია თქვენი ფეისბუქ კამპანიებიის თანმიმდევრულობის დაცვასა და მყიდველის მოგზაურობის ეტაპებთან შესაბამისობასთან. მომხმარებლების დაინტერესებიდან, რეალურ და კმაყოფილ მომხმარებლად გადაქცევამდე.
ფეისბუქის სარეკლამო ძაბრის შექმნის პროცესი ფეისბუქ კამპანიისთვის სწორი მიზნების შერჩევას, სწორი სამიზნე აუდიტორიის თარგეთირებას და ოპტიმალური სარეკლამო ფორმატის გამოყენებას მოიცავს. რაც მთავარია, მესიჯი თითოეული ეტაპისთვის რელევანტური უნდა იყოს.
შენიშვნა: ფეისბუქისა და ინსტაგრამის რეკლამები ერთ სარეკლამო პლატფორმას - Facebook Ads მიეკუთვნება. სწორედ ამიტომ, მაგალითებად ორივე სოციალური ქსელის რეკლამებს იხილავთ.
პირველი საფეხური: TOFU - აქციეთ უცნობი ადამიანები პოტენციურ მომხმარებლებად
სარეკლამო ძაბრის სათავეში - ცნობადობის საფეხურზე, თქვენი მთავარი მიზანი ახალი აუდიტორიის მოზიდვაა.
თუ თქვენ ნაიკის, იკეას ან კოკა-კოლას მსგავსი კომპანია არ ხართ, მაშინ ეს ახალი აუდიტორია თქვენთვის სრულიად უცხო ადამინებისგან შემდგარი ჯგუფია. სწორედ ამიტომ ვუწოდებთ მათ „ცივ“ აუდიტორიას. ისინი არ გიცნობენ, არ გენდობიან და არც თქვენი ბრენდით არიან დაინტერესბულნი, ჯერჯერობით!
თუ გსურთ, ეს ცივი აუდიტორია მცირედით მაინც მოათბოთ და პოტენციურ მომხმარებლებად აქციოთ, საჭიროა, მათ ასწავლოთ და დააანახოთ ის სარგებელი, რასაც თქვენი პროდუქტით ან მომსახურებით სთავაზობთ.
ნაცვლად იმისა, რომ ძაბრის პირველ ეტაპად კონვერსია აქციოთ, გაზარდეთ ბრენდის ცნობადობა და დაეხმარეთ ხალხს იმის გააზრებაში, რომ თქვენი პროდუქტი მათ სჭირდებათ. გაუსვით ხაზი მათ ინტერესებს, საჭიროებებსა და პრობლემებს და უთხარით, თუ როგორ შეგიძლიათ მათი გადაწყვეტა.
საჭიროა, თქვენი რეკლამები თქვენ მიერ შეთავაზებულ უნიკალურ სარგებელს წარმოაჩენდეს. გახადეთ ეს ეტაპი რაც შეიძლება ინფორმაციული და საგანმანათლებლო.
ამ ეტაპზე იუმორის შესანიშნავად მუშაობს.
Casper, რომელიც მატრასების მწარმოებელი კომპანიაა, ძალიან ნაზად აჩვენებს მომხმარებელს, თუ რამდენად საუცხოოა მათი მატრასი. ამას ისე ახერხებენ, რომ გაყიდვების სახეც კი არ აქვს რეკლამას.
„ხომ გსმენიათ იმ ხალხის შესახებ, ვინც ჰოკეით იკვებება, სუნთქავს და სძინავს?“
მატრასი იმდენად კარგია, რომ ვარსკვლავურ ათლეტს, როგორიცაა John Tavares სრულიად ახალ დონეზე აჰყავს კონცეფცია „იკვებე, ისუნთქე და იძინე ჰოკეით“.
ასევე გახსოვდეთ, რომ არც ძალიან ბევრი უნდა მოსთხოვოთ ამ ეტაპზე მომხმარებელს.
ჯერ ძალიან ადრეა იმისთვის, რომ მომხმარებელს უფასო საცდელი ვერსიის დაწყებისთვის ან თუნდაც კონსულტაციისკენ უბიძგოთ. მიუხედავად იმისა, რომ ის უფასოა, ადამიანთა უმრავლესობა დაფიქრდება და შეიძლება გადაიფიქროს კიდეც, ვინაიდან საკონტაქტო ინფორმაციის გაცემა უფასო პროდუქტისთვის ზედმეტად დიდი პასუხისმგებლობაა სრულიად უცნობი ადამიანისთვის.
თუმცა, ბიზნესის ტიპის გათვალისწინებითა და სამიზნე აუდიტორიაზე დაყრდნობით, უფასო გადმოსაწერმა საშუალებებმა, როგორიცაა ელექტრონული წიგნი ან მოხსენება, შესაძლოა ძალიან ეფექტურადაც იმუშავოს, ცნობადობის საფეხურზეც კი.
გახადეთ შეთავაზება რაც შეიძლება უსაფრთხო.
და ნუ იდარდებთ ამ დროისთვის, გაყიდვების დაბალ მაჩვენებელზე. ამ ეტაპზე, თითოეული ნაბიჯი მყარ საძირკველს ჩამოაყალიბებს თქვენი სამომავლო საფეხურებისთვის და გაზრდის კონვერსიის მაჩვენებლებს იმ დროისთვის, როდესაც ეს ყველაზე მნიშვნელოვანი იქნება.
ა) აუდიტორიის თარგეთირება ცნობადობის ეტაპზე
ცნობადობის ეტაპზე თქვენ სრულიად ახალ აუდიტორიას უკავშირდებით. ამისათვის კი მეტწილად ფეისბუქის აუდიტორიის ორი კატეგორიის გამოყენება დაგჭირდებათ:
- დამახსოვრებული აუდიტორია (Saved Audience)
- მსგავსი აუდიტორია (Lookalike Audience)
დამახსოვრებული აუდიტორიები საშუალებას გაძლევთ, აუდიტორია გაფილტროთ დემოგრაფიის, ადგილმდებარეობის, ინტერესებისა და ქცევების მიხედვით.
მაგალითად, თქვენ შეგიძლიათ შეარჩიოთ ქალბატონები, 25-55 წლის ფარგლებში, რომლებიც ცხოვრობენ თბილისში და დაინტერესებული არიან ძაღლის მოვლის საშუალებებით.
დამახსოვრებული აუდიტორიების შესაქმნელად გამოიყენეთ ყველანაირი ინფორმაცია თქვენი იდეალური მომხმარებლის შესახებ.
თუმცა, გახსოვდეთ, რომ ასევე სასურველია შედარებით ფართო აუდიტორიაზეც გახვიდეთ, რათა რაც შეიძლება მეტ ადამიანს დაუკავშირდეთ და მისცეთ ფეისბუქის ალგორითმს საშუალება, გააკეთოს თავისი საქმე.
კიდევ ერთი სახეობა, რომელიც ცობადობის ეტაპზე შეგიძლიათ გამოიყენოთ, არის მსგავსი აუდიტორიები.
თუ უკვე ფლობთ გარკვეულ მომხმარებელთა ბაზას, მაშინ ფეისბუქს შეუძლია იპოვოს მათი მსგავსი მომხმარებლები. ეს ძალიან ეფექტური და ძლიერი საშუალებაა, რადგან მისი დახმარებით შესაძლებელი ხდება, დაუკავშირდეთ თქვენი მყიდველების მსგავს ადამიანებს, რომელთა მომხმარებლებად ქცევის შანსიც გაცილებით მაღალია.
მსგავსი აუდიტორიის შექმნა თქვენი არსებული მომხმარებლებიდან ან ვებ-გვერდის მნახველებიდანაც შეგიძლიათ. გარდა ამისა, მის შესაქმნელად მომხმარებელთა სიცოცხლისუნარიანობის ღირებულების გამოყენების საშუალებაც გაქვთ.
ბ) ძაბრის სათავის კამპანიის მიზნები (objectives)
კამპანიის მიზანი განსაზღვრავს იმას, თუ რისთვის იმუშავებს ფეისბუქი და რას მოერგება მისი ალგორითმი. ცნობადობის ეტაპისთვის კამპანიის საუკეთესო მიზნებს წარმოადგენს:
- ბრენდის ცნობადობა
- რიჩი (მიღწევადობა)
- ტრაფიკი
- ვიდეოს ნახვები
- მესიჯები
თქვენი საწყისი მიზანი შეიძლება სულაც არ იყოს თქვენი საბოლოო მიზანი - კონვერსია, თუმცა ეს იქნება გზა, რომელიც დაგეხმარებათ, მიაწვდინოთ თქენი ხმა სასურველ მომხმარებელს.
მაქსიმალურად მოერიდეთ ცნობადობის ეტაპისთვის ისეთ მიზნებს, როგორიცაა კონვერსია, გაყიდვები და ლიდების გენერირება, ვინაიდან ცივ აუდიტორიასთან ისინი ნაკლებად ეფექტურია.
იქიდან გამომდინარე, რომ თქვენს რეკლამებს მაღალი კონვერსია არ ექნება და დამატებით, ამგვარ მიზნებზე მოთხოვნა დიდია, თქვენი სარეკლამო ხარჯებიც გაცილებით უფრო მაღალი იქნება.
ამიტომ უმჯობესია, თუ საწყის ეტაპზე მიკრო-კონვერსიაზე - რიჩზე, ტრაფიკზე ან ვიდეოს ნახვებზე ორიენტირდებით.
იყავით კონკრეტულები სასურველ მიზანთან მიმართებაში და შეარჩიეთ ისეთი, რომლის მომენტალურად შესასრულებლადაც იქნება აუდიტორია მზად.
არ აქვს მნიშვნელობა, რამდენად მცირე და უმნიშვნელო შეიძლება ჩანდეს ეს ყველაფერი ქვედა დონისთვის, თუმცა სწორი აუდიტორიის და რელევანტური ამოცანის კარგი კომბინაცია არის ის ყველაფერი, რაც სამომავლოდ სასურველ შედეგებს მოგიტანთ.
გ) ოპტიმალური რეკლამის ტიპი ცნობადობის ეტაპისთვის
ვინაიდან, ცივი აუდიტორია თქვენი ბრენდისთვის სრულიად უცხო ადამიანთა ჯგუფია, ისეთი ფეისბუქ რეკლამის შერჩევა გჭირდებათ, რომელიც მათ ყურადღებას მომენტალურად მიიპყრობს.
სარეკლამო ტიპები, რომელიც ცნობადობის ეტაპისთვის ნაცადი და აპრობირებულია, მოიცავს:
- ვიდეო რეკლამა (video ads)
- კოლექციური რეკლამა (collection ads)
- ვიზუალური რეკლამა (image ads)
- კარუსელი (carousel ads)
- მომენტალური გამოცდილების რეკლამა (instant experience ads)
მყიდველის მოგზაურობის დასაწყებად ერთ-ერთი საუკეთესო საშუალება ფეისბუქის ვიდეო რეკლამაა.
ვიდეო რეკლამა შესანიშნავი სარეკლამო ფორმატია, რადგან ის საშუალებას გაძლევთ, მომხმარებელს გააცნოთ თქვენი ბრენდი და წარუდგინოთ მას ის უნიკალური სარგებელი, რასაც თქვენი პროდუქტი/მომსახურება სთავაზობს. ვიდეო რეკლამა ასევე შესანიშნავი საშუალებაა იმისათვის, რომ ცივ აუდიტორიას შეაწყვეტინოს სქროლვა და მათი ყურადღება მომენტალურად მიიზიდოს. სწორედ ამიტომ, თქვენი ვიდეო რეკლამის უნიკალურ ღირებულებზე მიმართვა ძალიან ძლიერ და საინტერესო შთაბეჭდილებას დატოვებს.
Daily Life ფეიბსუქ რეკლამა ახალი ნაპერწკლის გასაჩენად აჩვენებს სანთელს, რომელიც იწვის, თანდართული მარტივი მესიჯით: „გრძნობთ, რომ გადაიწვით?“
„წარმოიდგინეთ, შეგეძლოთ გაიგოთ ზუსტად რომელი ჩაკრა გაქვთ დაბლოკილი, დაბალანსებული, სუსტი ან ძლიერი.
თქვენდა სასიხარულოდ, წარმოდგენა საჭირო აღარ არის“.
Tailord Athlete იყენებს ვიდეო რეკლამას, რომელიც მომენტალურად იქცევს მომხმარებლის ყურადღებას და აჩვენებს, თუ რამდენად იდეალურად ერგება მათი ჯინსები და პერანგები ადამიანის ტანს.
“დაიღალეთ ისეთი ჯინსების ძებნით, რომელიც თქვენს ტანს არ ერგება? ჩვენ შეგვიძლია თქვენი პრობლემის აღმოფხვრა.
გაიგეთ, თუ რატომ უყვარს ათასობით ათელტს ეს კომფორტული ჯინსები. შექმნილია ათლეტებისთვის, მორგებულია ათლეტებზე.“
ფეისბუქის რეკლამა გვიჩვენებს, რომ ჯინსები იმდენად კომფორტულია, შეგიძლიათ უკანა ბრუნიც კი გააკეთოთ.
თქვენი პროდუქტისა და მომსახურების შესახებ მიმზიდველი ისტორიის მოყოლა, რომელიც აღწერს თქვენი პროდუქტის უნიკალურ მახასიათებლებს, მომხმარებლისთვის შეუდარებელ გმაოცდილებას შექმნის. შედეგად, როდესაც მომხმარებელი შემდეგ ეტაპებზე თქვენს რეკლამას ნახავს, უკვე მარტივად იცნობს თქვენს ბრენდს.
თუმცა, ცივ აუდიტორიასთან დასაახლოვებლად ვიდეო რეკლამის კიდევ ერთი, კრიტიკულად მნიშვნელოვანი სარგებელი არსებობს.
ფეისბუქის სარეკლამო ძაბრი, რომელშიც ვიდეო რეკლამა ფუნქციონირებს, გვაძლევს მომხმარებლის რეთარგეთირების საშუალებას იმის მიხედვით, თუ ვიდეოს რა ნაწილი ნახა მან.
ეს შესანიშნავი გზაა მომხმარებლის შემდეგ ეტაპზე გადასაყვანად.
თქვენ შეგიძლიათ, შექმნათ პერსონალიზებული აუდიტორია იმ ადამიანებისგან, რომლებმაც მაგალითად თქვენი ვიდეოს 25% ან 50%-ს უყურეს.
თქვენი კამპანიის მიზნად ვიდეოს ნახვების შერჩევის შემთხვევაში, ფეისბუქი თქვენს ხარჯებს CPM (დანახარჯი რეკლამის ათას გამოჩენაზე) მიხედვით გაკისრებთ.
ვიდეო სახის კამპანიები გეხმარებათ, აუდიტორიის ძალიან ვრცელ მოცულობას დაუკავშირდეთ, პოზიციონირდეთ მომხმარებლის გონებაში და შეამციროთ მომხმარებლის მოზიდვის ხარჯები (CAC).
და ნუ შეგაყოვნებთ ვიდეოს შექმნის ან გადაკეთების პროცესი. შეგიძლიათ, ისეთი მარტივი ხელსაწყოები გამოიყენოთ, როგორიცაა Canva, Offeo და Animoto და შექმნათ თქვენი ვიდეო რეკლამა.
გარდა ამისა, შეგიძლიათ თქვენი ფეისბუქ ვიდეოებიც გადააკეთოთ. ამასთან ერთად, ფეისბუქის ვიდეოს შემქმნელი ხელსაწყოს საშუალებით, შეგიძლიათ თქვენი სტატიკური სურათი ვიდეო რეკლამად აქციოთ.
კოლექციური რეკლამები, მეორეს მხრივ გეხმარებათ, გააერთიანოთ თქვენი ვიზუალური და ვიდეო რეკლამები და მათი ერთობლივი ეფექტით მოუყვეთ მომხმარებელს თქვენი ისტორია, აჩვენოთ თქვენი პროდუქცია და წარმოაჩინოთ ძირითადი მახასიათებლები.
Klein Watches იყენებს კოლექციურ რეკლამებს, რათა წარმოაჩინოს იმ ადამიანთა ცხოვრების სტილი, რომელიც მათ საათებს ატარებს და ამასთანავე, მისი საათების კატალოგსაც გვთავაზობს.
„თქვენი სტილი უნდა ემთხვეოდეს თქვენს ამბიციებს“
იმ შემთხვევაში, თუ ვიდეობს არ ფლობთ, მაშინ კარუსელ რეკლამები და უბრალოდ სურათებიც ეფექტურად იმუშვებს, განსაკუთრებით ცნობადობის ეტაპზე.
სამწუხაროდ, თქვენ არ გექნებათ შესაძლებლობა, შექმნათ ახალი პერსონალიზებული აუდიტორია იმ მომხმარებელზე დაყრდნობით, რომლებიც თქვენს ვიზუალურ ან კარუსელ რეკლამას გამოეხმაურნენ.
უბრალოდ დარწმუნდით, რომ შესაფერის სარეკლამო კატეგორიასა და რელევანტურ CTA (Call-to-action) იყენებთ ცივი აუდიტორიისთვის.
დ) საუკეთესო სარეკლამო ტექსტი, CTA და შეთავაზება ცივი აუდიტორიისთვის
როდესაც ცივი აუდიტორიისთვის ქმნით რეკლამებს, საჭიროა, მცირეოდენი მოთმინება იქონიოთ. ზედმეტად ნუ დატვირთავთ თქვენს პოტენციურ მომხმარებლებს.
გამოიყენეთ ფეისბუქ რეკლამები, რომ შეგამჩნიონ, წარმოადგინოთ თქვენი ბრენდი და ამ სრულიად უცნობ ადამიანებთან შეამზადოთ ურთიერთობა შემდეგი ეტაპებისთვის.
აწარმოეთ სახალისო, გამოსადეგი კონტენტი სათანადო შეთავაზებებთან ერთად. უბრალოდ საჭიროა, რომ მომხმარებლისგან ეს ყველაფერი დიდ ძალისხმევას არ საჭიროებდეს.
ცნობადობის ეტაპისთვის შეთავაზებების რამდენიმე კარგ მაგალითს წარმოადგენს:
- ვიდეოს ყურება
- ვებ-გვერდის სტუმრობა
- ქვიზის დაწერა
- პროდუქტის განცობა
ნებისმიერი მოქმედება, რომელიც დიდ ვალდებულებას არ მოითხოვს, ცივი აუდიტორიისთვის იდეალურია. ეს არის კიდევ ერთი მიზეზი, თუ რატომ მოგიტანთ ვიდეოს ნახვები შესანიშნავ შედეგებს.
უფასო პროდუქტის გაცემაც კი შესაძლოა, რთული დავალება აღმოჩნდეს ცივი აუდიტორიისთვის იმ შემთხვევაში, თუ ის სანაცვლოდ მეილის გაცემას ან საკონტაქტო ინფორმაციის მიღებას მოითხოვს.
გარდა ამისა, დარწმუნდით, რომ ფეისბუქ რეკლამა თქვენი პროდუქტის/მომსახურების საჭიროებებზეც საუბრობს. მოარგეთ თქვენი სარეკლმაო ტექსტი უნიკალურ მახასიათებლებს, ნაცვლად იმისა, რომ კარდაკარ გაყიდვების ტექსტებით ისაუბროთ.
მაგალითისათვის გაეცანით Fresh Cove რეკლამას:
რეკლამა არ მოიცავს ვერბალურ პრეზენტაციას. ინსტაგრამ რეკლამა მხოლოდ ფასეულობებს უსამს ხაზს, იმ მახასიათებლებს, რომლებიც მათ პროდუქტს გამოარჩევს.
რეკლამა არ მოიცავს ფასს, ფასდაკლებას ან რაიმე სხვა შეთავაზებას, უბრალოდ დამაჯერებელ დებულებას:
„თქვენი მამაკაცურობა საუკეთესოს იმსახურებს.“
რთულია, ამას შევეწინააღმდეგოთ.
Bellabeat-ის ფეისბუქის რეკლამა ასეთ შეკითხვას სვამს:
„რა იქნებოდა, თუ ერთ საიუვილერო ნივთს შეეძლებოდა თქვენი ცხოვრების შეცვლა?!“
ძირითადად ასეთი ტიპის რეკლამები არაფერს მოითხოვს მომხმარებლისგან, გარდა ერთ კლიკსა და უფრო მეტის შესწავლას.
საკმაოდ მნიშვნელოვანია, სწორად შეარჩიოთ თქვენი CTA ღილაკებიც (რომლებიც მომხმარებელს ქმედებისკენ უბიძგებს). ფეისბუქ რეკლამისთვის ყველაზე ოპტიმალურ სახეობებში ამ ეტაპისთვის, შედის:
- გაიგეთ მეტი (learn more)
- გააგრძელეთ ყურება (watch more)
- გაეცანით მენიუს (see menu)
- დაჯავშნეთ ახლავე (book now)
- გაგზავნეთ შეტყობინება (send message)
თუ მიაქციეთ ყურადღება აქამდე განხილულ რეკლამებს, შენიშნავდით, რომ უმეტესობა მათგანს ერთი რამ ახასიათებს: მათი CTA ღილაკები ძირითადად „გაიგეთ მეტი“ არის.
იმიტომ, რომ მოქმედებისაკენ ბიძგის მისაცემად ის ყველაზე ნაკლებად დამაფრთხობელი გზაა.
ზოგიერთ შემთხვევებში, თქვენ ასევე შეგიძლიათ, სცადოთ ღილაკები „შეიძინეთ ახლავე“, „ჩამოტვირთეთ“ ან „დარეგისტრირდით.“ ნუ მოერიდებით სხვადასხვა CTA ღილაკების მოსინჯვას, შეაფასეთ, თუ როგორ იმუშავებს ის თქვენს აუდიტორიაზე და საბოლოოდ ყველაზე ოპტიმალური შეარჩიეთ.
ერთი რამ, რაც ცნობადობის ეტაპზე ნამდვილად უნდა აიცილოთ თავიდან, ეს არის ფასებზე საუბარი.
თქვენი პროდუქციის პირდაპირ პრეზენტაცია ცივ აუდიტორიასთან, უბრალოდ არ იმუშავებს. ნუ დაგავიწყდებათ, რომ ეს ადამიანები სრულიად უცნობები არიან თქვენი ბრენდისთვის, ამიტომ ეცადეთ, თქვენი მიდგომა მინიმალურად იყოს მიმართული გაყიდვებისკენ. წინააღმდეგ შემთხვევაში, ეს მათ დააფრთხობს.
მსგავსი შეთავაზებები შემდეგი ეტაპისთვის შემოინახეთ.
მეორე ეტაპი: MOFU - აქციეთ პოტენციური მომხმარებლები ლიდებად
სარეკლამო ძაბრის შუა ნაწილში თქვენი მთავარი მიზანი პოტენციური მომხმარებლების ლიდებად ქცევას და მათი საკონტაქტო ინფორმაციის შეგროვებას წარმოადგენს.
გამოიყენეთ წინა ეტაპიდან წამოსული თბილი აუდიტორია და ეცადეთ ისინი დააინტერესოთ იმისათვის, რომ შემდგომში თქვენი პროდუქტის ან მომსახურების შესაძენად მზად იყვნენ.
საჭიროა, ამ ეტაპზე თქვენი პოტენციური მომხმარებლები თქვენს პროდუქტსაც განიხილავდნენ. სწორედ ამიტომ ეწოდება ამ ეტაპს - განხილვის ეტაპი.
იდეალურ სცენარში პოტენციური მომხმარებელი უნდა ესტუმროს თქვენს ვებ-გვერდს ან ლენდინგ გვერდს, მოიხიბლოს თქვენი ძირითადადი შეთავაზებით და დატოვოს მისი საკონტაქტო ინფორმაცია. სწორედ ამიტომ, დარწმუნდით, რომ პროფესიონალურ ვებ-გვერდს ფლობთ, რომელიც სრულად მორგებულია მომხმარებელზე.
განხილვის ეტაპი საუკეთესო დროა თქვენი მომხმარებლისთვის ელექტრონული ფოსტის სათხოვნელად, თუმცა, სანაცვლოდაც უნდა გასცეთ რაიმე ღირებული. ისეთი, როგორიც არის ჩამოსატვირთი მასალები, სპეციალური შეთავაზებები ან პროდუქტის საცდელი ვერსიები.
„მკაფიოდ განსაზღვრულ სისტემას შეუძლია, თქვენი ბიზნესი მეტად პროგნოზირებადი, გაზომვადი და განვითარებადი გახადოს. როგორ ჟღერს ეს ყველაფერი?“
ამ ეტაპისთვის, ძალიან კარგი იქნება, თუ სპეციალიზებული ლენდინგ გვერდი გექნებათ, რომელიც კონკრეტულად ლიდების ათვისებაზე იქნება მიმართული.
Ontraport-ს შექმნილი აქვს მცირე გვერდი, რომელიც მომხმარებელს საკონტაქტო ინფორმაცის გაცვლას სთხოვს უფასო ბიზნეს გზამკვლევის სანაცვლოდ.
ლიდების ინფორმაციის მიღება კრიტიკულად მნიშვნელოვანია. მათთან ურთიერთობის გასაღრმავებლად შეგიძლიათ, იმეილ რემარკეტინგი გამოიყენოთ და ეტაპობრივად დაახლოვდეთ თქვენს მომხმარებელთან.
პოტენციური მომხმარებლები ჯერ კიდევ შორს არიან შესყიდვის გადაწყვეტილების მიღებისგან, ამიტომ ნუ უბიძგებთ მათ ზედმეტად. იყავით ზომიერი.
განხილვის ეტაპი ასევე მნიშვნელოვანი შესაძლებლობაა ნდობის ჩამოსაყალიბებლად.
ადამიანები, რომლებიც თქვენს პროდუქტს სცდიან, უფრო ახლოვდებიან თქვენს ბრენდთან. თუმცა, ეს არ ნიშნავს, რომ ისინი უკვე თქვენი მომხმარებლები ხდებიან. მოთმინება!
ა) აუდიტორიის თარგეთირება შერჩევის ეტაპზე
შერჩევის ეტაპზე სამიზნე აუდიტორიებად ისეთი წევრები მოიაზრებიან, რომლებსაც უკვე გარკვეული ინტერესი აქვთ გამოხატული თქვენი ბრენდის მიმართ და შესაძლოა, თქვენი ვებ-გვერდიც მოინახულეს.
შერჩევის ეტაპისთვის აუდიტორიის საუკეთესო სახეობებს წარმოადგენს:
- პერსონალიზებული აუდიტორია
- მსგავსი აუდიტორია
შექმენით პერსონალიზებული აუდიტორია , რომელიც ისეთ მომხმარებლებს მოიცავს, ვინც ახლახანს ნახა თქვენი ფეისბუქ რეკლამა, ეწვია თქვენს ლენდინგ გვერდს და გამოთქვა გარკვეული ინტერესი თქვენი პროდუქტის მიმართ.
გააერთიანეთ მასში წინა ეტაპიდან მოკრებილი თითოეული ადამიანი.
გამოიყენეთ პერსონალიზებული აუდიტორიები, რათა შეძლოთ იმ მომხმარებლების რეთარგეთირება, რომლებმაც მოინახულეს თქვენი ვებ-გვერდი ან გამოეხმაურნენ თქვენს ფეისბუქ გვერდს.
სწორედ ახლა არის დრო, მონიშნოთ ის ადამიანები, ვინც თქვენი ვიდეოს 25-50 პროცენტს უყურა.
ასევე შეგიძლიათ, ისეთი ადამიანებიც მონიშნოთ, რომლებაც თქვენი საკოლექციო რეკლამა იხილა.
გარდა ამისა, არ დაგავიწყდეთ მსგავსი აუდიტორიების შექმნა, სადაც ისეთი ადამიანები მოიაზრებიან, რომლებიც თქვენი პერსონალიზებული აუდიტორიის მსგავსი იქნება.
დამატებით, როდესაც თქვენი სარეკლამო ძაბრის შუა რგოლი გარკვეული ტრაფიკის წარმოებას დაიწყებს და ადამიანებს მოიზიდავს, შექმენით მსგავსი აუდიტორიები, სადაც ისეთი პოტენციური მომხმარებლები იქნებიან გაერთიანებული, რომელთა ლიდად ფორმირების შანსებიც გაცილებით მაღალია.
ბ) კამპანიის მიზნები ძაბრის შუა რგოლისთვის
განხილვის ეტაპზე, ანუ ძაბრის შუა რგოლში, სასურველია, თქვენი პოტენციური მომხმარებლები ლიდებად გარდაქმნათ და მათი საკონტაქტო ინფორმაცია მოიპოვოთ. სწორედ ამიტომ არის საჭირო ამ ეტაპზე კამპანიის სწორი მიზნების შერჩევა. ისეთი მიზნების, რომლებიც ლიდების გენერირებაზე იქნება ორიენტირებული, მაგალითად:
- ტრაფიკი
- ჩართულობა
- ლიდების გენერირება
- მესიჯები
- კონვერსია
ტრაფიკი, როგორც ამოცანა, შესაძლოა ძალიან ეფექტური აღმოჩნდეს თუ უფრო მეტი კლიკის, ან ვიზიტორის მოგროვება გსურთ.
მესიჯები იდეალურია ისეთი ბიზნესების მოდელისთვის, რომელიც პირდაპირ კომუნიკაციას მოიცავს პოტენციურ მომხმარებელთან.
ფეისბუქმა ბოლო პერიოდში დანერგა ლიდების გენერირების ახალი ფუნქცია, რომელიც ლიდებისთვის განკუთვნილ სპეციალურ სარეკლამო ფორმას მოიცავს. ეს ფორმატი მომხმარებელს საშუალებას აძლევს, პირდაპირ შეავსოს ინფორმაცია თქვენი რეკლამიდან, ისე, რომ ფეისბუქის დატოვებაც არ მოუხდეს.
ლიდების ფორმა ფაქტობრივად მინიმალურ ძალისხმევას მოითხოვს და შეუძლია, საგრძნობლად გაზარდოს თქვენი რეგისტრაციების მაჩვენებელი.
გარდა ამისა, მისი დახმარებით შესაძლოა, ლენდინგ გვერდის შექმნასაც კი ასცდეთ.
თუმცა, ლიდების სარეკლამო ფორმები მხოლოდ მობილურ მოწყობილობებზეა ხელმისაწვდომი და დამატებით, შესაძლოა ყველა ფუნქციაზეც არ გქონდეთ წვდომა. გარდა ამისა, თუ თქვენი კამპანიიდან სასურველ შედეგებს იღებთ, შეგიძლიათ სხვადასხვა ამოცანები მოსინჯოთ და ნახოთ როგორ იმუშავებენ ისინი და რა დანახარჯებს მოგიტანენ.
გ) განხილვის ეტაპზე შერჩეული რეკლამის ოპტიმალური სახეობა
განხილვის ეტაპზე ყველაზე კარგად რამდენიმე ფორმატის რეკლამა მუშაობს:
- გამოსახულებითი რეკლამა (ცალკეული სურათი)
- კოლაჟური რეკლამა (რამდენიმე სურათი)
ამ დროისათვის, ყველაზე პოპულარული ფეისბუქ რეკლამა განხილვის ეტაპისთვის არის გამოსახულებითი რეკლამები. ConsenSys - ბლოკჩეინ დეველოპერიც სწორედ მას იყენებს, რათა ხალხს უფასო საშუალებების ჩამოტვირთვა შესთავაზოს.
თუმცა მეორე ფორმატიც ასევე ეფექტური შეიძლება იყოს ელექტრონული კომერციისათვის.
და კიდევ სხვა ბიზნეს მოდელებისთვის, როგორიც არის SAAS ანალიტიკური ხელსაწყოები.
განხილვის ეტაპზე პროცესი მეტად მარტივი და სწორხაზოვანია, რადგან ხალხი გარკვეულწილად უკვე იცნობს თქვენს ბრედნსა და პროდუქტს. ამიტომაც არაა საჭირო კომპლექსური სარეკლამო ფორმატები. ეცადეთ, რაც შეიძლება მარტივები იყოთ და ფოკუსი სწორი მესიჯის მიწოდებაზე გააკეთოთ.
დ) საუკეთესო სარეკლამო ტექსტი, CTA ღილაკი და შეთავაზება თბილი აუდიტორიისთვის
განხილვის სტადიაზე პოტენციური მომხარებელი უკვე დაინტერესებულია და თქვენ მოგეთხოვებათ, რომ მათ უბრალოდ მცირედი ბიძგი მისცეთ, რათა მათი ინტერესი სურვილში გადაიზარდოს. ასევე, უკვე დროა, რომ უფრო ღირებული ქმედებებიც მოაყოლოთ, მაგალითად რეგისტრაციები.
იმისათვის, რომ ხალხს საკუთარი საკონტაქტო ინფორმაცია დაატოვებინოთ, საჭიროა ძალიან მიმზიდველი იყოთ. გახსოვდეთ, რასაც Facebook რეკლამის საშუალებით ითხოვთ მომხარებლისგან, პროპორციულად იგივე ღირებულების საგანს უნდა გასცემდეთ მათთვის.
რაიმე უფასოს გაცემა საკონტაქტო ინფორმაციის ან მეილის სანაცვლოდ საკმაოდ სამართლიანი გაცვლაა. ეს გეხმარებათ თანდათანობით ნდობის მოპოვებაში, რაც საბოლოოდ გარიგების დახურვის აუცილებელი წინაპირობაა.
აპრობირებული მეთოდები, რომლითაც ლიდების მოზიდვას შეძლებთ, არის:
- უფასო საცდელი ვერსიები
- ვებინარები
- უფასო ნიმუშები
- სპეციალური შეთავაზებები და ფასდაკლებები
- პროდუქტის დემო ვერსიები
- ჩამოსატვირთი ელექტრონული წიგნები, მოხსენებები ან ქეისები
- ან უბრალოდ საჩუქრები
მაგალითად, ArchiTonic თავის პოტენციურ მომხარებელს სთავაზობს რეგისტრაციას, რათა შანსი ჰქონდეთ, მოიგონ სპეციალურად შექმნილი, კომფორტული საოფისე სავარძელი.
Axis თავის მომხარებელს სთავაზობს შესანიშნავ ფასდაკლებას რეგისტრაციის სანაცვლოდ.
თუ თქვენ ელექტრონული კომერციის საშუალებით ვაჭრობთ, მარტივად აღსაქმელი პროდუქტებით შეგიძლიათ მომხმარებლები პირდაპირ თქვენს ვებ-გვერდზე გადაამისამართოთ ღილაკით - „შეიძინეთ ახლავე“.
და შემდეგ უკვე ვებ-გვერდს მიანდეთ ამ ლიდის დამუშვება პატარა სარეკლამო ფორმის მეშვეობით.
უბრალოდ ეცადეთ, თქვენით დაინტერესებულ და კეთილად განწყობილ მომხარებელს შესაფერისი ფორმით შესთავაზოთ ესა თუ ის პროდუქტი.
განსხვავებით იმ რეკლამებისა, რომელიც გაცნობითი ხასიათისაა და პროდუქტის მახასიათებლებზე და სარგებელზე გვამცნობს, განხილვის საფეხურზე უფრო მეტი გჭირდებათ:
- სოციალური მტკიცებულება
- რისკის არ არსებობა
- მიღებული უფასო პროდუქტის ღირებულება.
Lumin საკუთარ მომხარებელს სთაავაზობს ერთ თვიან საცდელ პროდუქციას მათი კანის მოვლის საშუალებებისთვის.
თუ დააკვირდებით, რეკლამა შეიცავს პატარა ტექსტურ მინიშნებებს „60 000 ბედნიერი მომხარებელი“, „სცადეთ 30 დღის განმავლობაში უფასოდ“, ასევე რეიტინგს ვარკსვლავების მიხედვით.
მას შემდეგ, რაც მომხარებელი ახლოდან გაიცნობს თქვენს ბრენდს და დაინტერესდება პროდუქტით თუ მომსახურებით, შეგიძლიათ, მოქმედებისაკენ მოწოდებისას უფრო აგრესიული ენაც გამოყენოთ.
ამ ეტაპისთვის გამოსადეგი CTA ღილაკები შეიძლება იყოს:
- გაიარეთ რეგისტრაცია
- მიიღეთ შეთავაზება
- ჩამოტვირთეთ
- Get Quote
- გამოიწერეთ არხი
- გაიგეთ მეტი
- დაჯავშნეთ ახლავე
- შეიძინეთ ახლავე
- დააინსტალირეთ ახლავე (აპლიკაციებისთვის)
მესამე საფეხური: BOFU - აქციეთ ლიდები მომხმარებლებად
საბოლოოდ, თქვენი ფეისბუქ რეკლამის მიზანია, რომ ლიდები აქციოთ მომხმარებლებად და დაიწყოთ პირდაპირი გაყიდვები!
წინა საფეხურებზე თქვენ გააცანით აუდიტორიას თქვენი ბრენდი, დააინტერესეთ მომხმარებლები და მოიპოვეთ მათი ნდობა სხვადასხვა საშუალებებით. ამიტომაც, ისინი ახლა ყველაზე მეტად არიან ტონუსში.
დარწმუნდით, რომ თქვენ მკაფიოდ და ნათლად აწვდით აუდიტორიას თქვენს ღირებულებას და ანდომებთ თქვენს პროდუქტს. ასევე საჭიროა სწრაფი რეაგირება, „რკინა სანამ ცხელია, მანამდე უნდა მოღუნო.“
MizuTowel ცდილობს, წარმოაჩინოს საკუთარი ფასეულობები BOFU ფეისბუქ რეკლამის საშუალებით და ამავდროულად სთავაზობს მომხარებელს 40% ფასდაკლებას ლიმიტირებული დროით, რათა მათ სწრაფ რეაგირებას შეუწყოს ხელი.
კონვერტაციის სტადიის მთავარი მიზანია, პოტენციური მომხმარებლები და ლიდები მოიზიდოს და მათ პროდუქტის/მომსახურების შეძენისაკენ უბიძგოს.
ა) სამიზნე აუდიტორიის შერჩევა კონვერტაციის ეტაპზე
ამ ეტაპზე აუდიტორიის შერჩევა საკმაოდ სპეციფიკური უნდა იყოს და ფოკუსირდებოდეს ლიდების კონკრეტულ ჯგუფებზე. ასევე ყურადღება უნდა მიაქციოთ და გამორიცხოთ ის ადამიანები, რომლებიც უკვე თქვენი მომხმარებლები გახდნენ.
კონვერტაციის ეტაპისთვის გამოყავით შემდეგი აუდიორიები:
- პერსონალური აუდიტორია (ლიდებისგან შემდგარი)
- მსგავსი აუდიტორიები (თქვენი აუდიტორიის მსგავსი)
მიუთითეთ ფეისბუქზე თქვენი პერსონალიზებული აუდიტორიები, რათა იმ ხალხსაც მიაღწიოთ, ვინც წინა საფეხურებზე დაგიკავშირდათ გარკვეული გზებით.
თქვენ შეგიძლიათ, სამიზნედ საიტის ყველა მნახველი აარჩიოთ, იქნება ეს ადამიანი, რომელმაც გარკვეული დრო დაჰყო თქვენს ვებ-გვერზე, თუ მნახველი, რომელიც კონკრეტულ გვერდზე გადავიდა.
როგორც აქამდე, ახლაც შექმენით მსგავსი აუდიტორიები, რათა განავრცოთ თქვენი მიღწევადობის არეალი.
თუ თქვენ ონლაინ მაღაზიას მართავთ, აირჩიეთ კატალოგის გაყიდვების კამპანია და თქვენ შეძლებთ, აირჩიოთ ისეთი აუდიტორია, რომელიც უკვე ეწვია თქვენს ვებ-გვერდს, ან კალათაში დაამატა პროდუქცია, მაგრამ ჯერ არ შეუძენია.
აუდიტორიის შერჩევის ამგვარი სტრატეგია საკმაოდ ძლიერი და ეფექტურია, რადგან ის საშუალებას გაძლევთ, დაიბრუნოთ გაშვებული შესაძლებლობები და გაზარდოთ თქვენი გაყიდვები.
ბ) მიზნები ძაბრის ქვედა ეტაპისთვის
თქვენი კამპანიის ძირი უკვე მომხმარებლების შეძენაა. სწორედ ამიტომაა საჭირო თქვენი ფეისბუქ არხების კამპანიის ოპტიმიზაცია.
დარწმუნდით, რომ იყენებთ Facebook Pixel-ს კონვერტაციის მონიტორინგისთვის, რათა ნახოთ კამპანიის ფარგლებში თქვენი შემოსავლებისა და კონვერტაციის მონაცემები. ეს ეხმარება ფეისბუქს იმის განსაზღვრაში, თუ რა მუშაობს და შემდეგ უკეთ ახდენს კამპანიების ოპტიმიზაციას.
ფეისბუქ კამპანიების სამი ძირითადი დავალება/მიზანი, რომელიც უნდა გამოიყენოთ არის:
- კონვერტაციები
- კატალოგის გაყიდვები
- მაღაზიის ტრაფიკი
კონვერტაციის მიზნად არჩევა ძალიან კარგია BOFU კამპანიებისთვის, რადგან ის კონვერტაციის მაქსიმალურ მაჩვენებელზეა ორიენტირებული. ვინაიდან, ამ ეტაპზე აუდიტორია უკვე შემზადებულია, კონვერტაციის შანსიც უფრო მაღალია.
კატალოგის გაყიდვები ძალიან კარგად მუშაობს ელ. კომერციის ბიზნესებისათვის, რომელთა პროდუქტებიც ფეისბუქთან არის ინტეგრირებული, რათა უკეთ მოახდინოს შესყიდვების, კალათების შექმნისა თუ მიტოვების მონიტორინგი.
თქვენ შეგიძლიათ, მარტივად ატვირთოთ WooCommerce პროდუქტის კატალოგი ფეისბუქზე, მათივე პლატფორმის გამოყენებით.
კატალოგის გაყიდვების მიზანი ახდენს თქვენი კამპანიის ფარგლებში მაქსიმალური გაყიდვების ოპტიმიზაციას. ის ასევე საშუალებას გაძლევთ, შექმნათ პროდუქციის დინამიური რეკლამები, რომლებზეც შემდეგ სექციაში ვისაუბრებთ.
არ დაგავიწყდეთ, რომ დააკვირდეთ თქვენს კონვერტაციას, მომხმარებლის შეძენის ღირებულებას (CAC) , შემოსავლებსა და სხვა KPI -ს, რათა შეძლოთ კამპანიის საერთო სურათის დანახვა.
და ბოლოს, მაღაზიათა ვიზიტის დავალება არის ძალიან კარგი საშუალება ისეთი მოვაჭრეებისთვის, რომლებიც ფიზიკურ მაღაზიებს მართავენ და სურთ, უფრო მეტი მომხარებელი მოიზიდონ მათ კარებამდე.
გ) კონვერტაციის ეტაპზე რეკლამის ოპტიმალური სახეობა
კონვერტაციის ეტაპისთვის რეკლამების საუკეთესო ფორმატებია:
- გამოსახულებითი რეკლამა
- DPA - პროდუქტის დინამიური რეკლამა
- კარუსელები (Carousel ads)
გამოსახულებითი რეკლამები კარგი საშუალებაა, თუ თქვენ ერთ ძირითად პროდუქტს ან მომსახურებას ყიდით. არაა საჭირო, საქმე გაირთულოთ, მიმართეთ თქვენი კამპანია კონკრეტული პროდუქტისაკენ.
კოლაჟების საშუალებით თქვენ შეგიძლიათ, აჩვენოთ რამდენიმე ახალი ან ყველაზე გაყიდვადი პროდუქტები თქვენი საიტის მნახველებს.
დინამიური რეკლამები პირდაპირ სწორ პროდუქტს აჩვენებს იმ ხალხს, ვინც უკვე გამოხატა ინტერესი. მაგალითად, თუ მყიდველი ნახულობს თქვენს ვებ-გვერდზე ყავის ჭიქას, ქოლგას ან კალამს, შემდეგ ჯერზე ფეისბუქი მას დინამიურად მიმართავს ამ პროდუქტებისაკენ.
LikeBunny იყენებს დინამიურ რეკლამებს, რათა შეგახსენოთ იმ დროის შესახებ, როდესაც თქვენ რაიმეს ეძებდით. შეთავაზების ხელშესაწყობად კი იქვე სპეციალურ, 50%-იან ფასდაკლებასაც გთავაზობთ.
ეს ფრაზა „არის ეს შენი სტილი!?“ სწორედ იმაზე მიანიშნებს, რომ ასეთ ტანსაცმელს შენ უკვე ეძებდი მათ საიტზე და გაცნობებთ, რომ ის უკვე ხელმისაწვდომია.
დ) საუკეთესო რეკლამა, CTA და შეთავაზება
შემზადებულ აუდიტორიას ცოტაღა აკლია საბოლოო შესყიდვამდე. მათ თქვენგან მცირეოდენი ბიძგი სჭირდებათ. თქვენი სარეკლამო მესიჯები სპეციფიკური, პირდაპირი და აზრიანი უნდა იყოს. ხელი შეუწყვეთ მომხმარებლის თავდაჯერებულობას და გააძლიერეთ მათი შესყიდვის სურვილი. იმოქმედეთ ისე, რომ თქვენს პროდუქტზე უარი ვეღარ თქვან.
ამ ეტაპზე ტკბილად საუბარი აღარაა საჭირო, ახლა მთავარია, თქვენი ღირებულება წარმოაჩინოთ. სასურველია, რომ თქვენი რეკლამა მოიცავდეს შემდეგს:
- ფასი
- ტრანსპორტირების შესაძლებლობა
- სპეციალური შეთავაზება და ფასდაკლებები
- დაზოგილი თანხა
- უფასო საჩუქარი
- სოციალური მტკიცებულება
- სასწრაფო საჭიროების შეგრძნება
- გარანტირებული, ურისკო შესყიდვა.
მაქსიმალურად ეცადეთ, გამოიყენოთ ის, რაც თქვენი მომხარებლისთვის უფრო სასურველი იქნებოდა.
კოსმეტიკის კომპანია ხელს უწყობს მყიდველის გადაწყვეტილებას 40%-იანი ფასდაკლებით და თანხის დაბრუნების სრული გარანტიით.
რა თმა უნდა, არ გსურთ, რომ თქვენმა მომხმარებელმა გადაიფიქროს პროდუქტის შეძენა. სწორედ ამიტომ უნდა შექმნათ გადაუდებელი შეძენის საჭიროება.
იმის ხსენება, თუ რამდენი ხანი მოქმედებს შეთავაზება, შეზღუდულია თუ არა პროდუქტის რაოდენობა, სწორედ ამას უზრუნველყოფს.
ძლიერი CTA მესიჯები, რომლებიც კონვერტაციის ეტაპზე მუშაობს, არის:
- შეიძინეთ ახლავე
- მიიღეთ შეთავაზება
- დარეგისტრირდით
- გამოიწერეთ
იყავით თავდაჯერებული თქვენი მესიჯის გავრცელებისას და მომხარებელი გარანტირებულად გეყოლებათ. თუმცა, პროდუქტის გაყიდვა მოგზაურობის დასასრულს სულაც არ ნიშნავს. პირიქით, ეს ახალი ურთიერთობის დასაწყისია.
მეოთხე ეტაპი: გაყიდვების შემდგომი პროცესი - CLV გაზრდა
თქვენი საუკეთესო მომხმარებელი, უკვე არსებულია. ამიტომაც, მოუფრთხილდით და იზრუნეთ მათზე.
არსებული მომხმარებლების გარდაქმნა ლოიალურ მომხმარებლებად საკმაოდ მნიშვნელოვანია, რადგან ის ახანგრძლივებს მათ CLV-ს (Customer lifetime value) და WoM-ის (word of mouth) დახმარებით, მეტი მომხმარებელის მოზიდვის საშუალებასაც გაძლევთ.
შესყიდვის შემდეგ გამოიყენეთ ფეისბუქ რეკლამები, რათა ორი ქმედების სტიმულირებას შეუწყოთ ხელი:
- განმეორებითი გაყიდვა
- WoM გავრცელება
არსებული მომხმარებლები ყველაზე მომგებიანები არიან, რადგან მათი შენარჩუნება უფრო იაფი და მარტივია.
როდესაც ის ხელახლა ყიდულობს რაიმე პროდუქტს, ის ახანგრძლივებს ამ კავშირს მომხმარებლის შეძენის ხარჯებთან მიმართებაშიც (CAC). CLV – CAC კოეფიციენტის ზრდა კი ნიშნავს, რომ მომხმარებელი უფრო მომგებიანია.
გარდა ამისა, შესაძლოა, მათ თქვენი ბრენდი და პროდუქცია თავიანთ სოციალურ ქსელში გააზიარონ. ვინაიდან, მათ უკვე შეიძინეს თქვენი პროდუქცია, მათი ყურადღების მიქცევა საჭირო აღარაა. უბრალოდ გამოხატეთ მათ მიმართ თქვენი პატივისცემა და მიეცით რაიმე სტიმული განმეორებითი შესყიდვისთვის.
ა) ყიდვის შემდეგი პროცესისთვის აუდიტორიის შერჩევა
ამ დროს აუდიტორიის შერჩევა ფეისბუქის მხოლოდ ერთ სახეობას ეფუძნება - პერსონალურ აუდიტორიას.
შექმენით თქვენი პერსონალიზებული აუდიტორია წინა მყიდველების მიხედვით. ამის კიდევ უფრო განვრცობა შეგიძლიათ CLV მონაცემების დახმარებით.
ბ) შესყიდვის შემდგომი კამპანიის მიზნები
თქვენი შემდგომი მიზანია, განმეორებით შესყიდვები მიიღოთ, შესაბამისად კონვერტაციის მიზნები უკეთ იმუშავებს. თქვენი ბიზნეს მოდელის მიხედვით, ფოკუსირდით რომელიმე მათგანზე:
- კონვერტაცია
- კატალოგის გაყიდვები
- მაღაზიის დატვირთვა
ამ მიზნების გამოყენებით, Facebook შეეცდება, თქვენი კამპანიის ფარგლებში რაც შეიძლება მეტი განმეორებით გაყიდვები მოგიტანოთ. უკეთესი შედეგისთვის მიუთითეთ კამპანიისას Value - ღირებულება, რათა გააუმჯობესოთ თქვენი უკუგება რეკლამაზე დახარჯული თანხისათვის (ROAS).
გ) ოპტიმალური რეკლამის სახეობა
ამ ეტაპზე, რეკლამის საუკეთესო სახეობაა:
- ვიდეო რეკლამები
- გამოსახულებითი რეკლამა
- კოლაჟები
- დინამიური რეკლამები
ვიდეო რეკლამები საუკეთესო საშუალებაა, თუ არსებული მომხმარებლისთვის ახალი პროდუქციის გაცნობა გსურთ. ის კარგად აღწერს პროდუქტის მახასიათებლებსა და სარგებელს.
ანალოგიურად, კარუსელებსა და დინამიურ რეკლამებს შეუძლია, წარმოაჩნიოს თქვენი ახალი პროდუქტები, რაც განსაკუთრებით გამოსადეგია ელექტრონული კომერციისთვის.
გამოსახულებითი რეკლამა კი განკუთვნილია რაიმე სპეციალური შეთავაზებისთვის.
დ) საუკეთესო რეკლამა, CTA და შეთავაზება არსებული მომხმარებლისთვის.
არსებული მომხმარებელი უკვე კარგად გიცნობთ, გენდობათ და უყვარს თქვენი პროდუქტი. ასევე თქვენც ბევრი რამ იცით მათ შესახებ, მათი სურვილების შესახებ. ამიტომ, თქვენ უნდა გამოიყენოთ Facebook რეკლამების მესიჯები იმისათვის, რომ მათთან უფრო ახლო ურთიერთობა ჩამოაყალიბოთ და მეტად თავისუფალი და ღია ურთიერთობა გქონდეთ.
ერთ-ერთი საუკეთსო გზა იმისათვის, რომ გახადოთ მომხმარებელი ბედნიერი, არის მათთვის იმის ჩვენება, რომ თქვენ ზრუნავთ მათზე და აწვდით მაღალი ხარისხის მომსახურებას.
გაახარეთ ისინი საჩუქრებით, ექსკლუზიური შეთავაზებებითა და სპეციალური შეღავათებით.
ამ ეტაპისთვის ყველაზე კარგად Facebook რეკლამა მუშაობს რიგ შემთხვევებში:
- როდესაც ახალ პროდუქტს უშვებთ
- მომხმარებლისგან ითხოვთ მიმოხილვასა და უკუკავშირს
- ხელს უწყობთ სოციალური მედიის წილის ზრდას
- ითხოვთ რეკომენდაციებს
- ხელს უწყობთ მომხმარებლის მიერ კონტენტის შექმნას (UGC)
- აწარმოებთ უფრო გამოსადეგ კონტენტს იმის შესახებ, თუ როგორ გამოიყენება თქვენი პროდუქტი/მომსახურება
- ატყობინებთ მომხმარებელს, რომ მარაგი იწურება
შესყიდვის შემდგომი ერთ-ერთი ტაქტიკაა ხალხისთვის იმის შეხსენება, რომ პროდუქტი მალე იწურება. შექმენით ამისათვის ფეისბუქ რეკლამა და შეახსენეთ მომხმარებელს, რომ დაბრუნდეს თქვენს ვებ-გვერდზე და პროდუქტი ხელახლა შეუკვეთოს.
Goli-მ იცის, თუ რამდენი ხანი სჭირდება მათი პროდუქტის მოხმარებას და შესაბამისად, იცის, თუ როდის უნდა გამოუჩინოს რელევანტური რეკლამა კონკრეტულ მომხმარებლებს.
10% პროცენტიანი შეღავათი საკმაოდ კარგი სტიმულია იმისათვის, რომ მომხმარებელი უკან დაბრუნდეს. ამისათვის შეგიძლიათ, შექმნათ პერსონალიზებული აუდიტორია, რომელიც მიმართული იქნება ისეთი მომხმარებლისკენ, რომლებმაც მაგალითად 30 ან 45 დღის წინ შეუკვეთეს პროდუქცია.
მაგალითად, თუ თქვენ ყიდით ჩაის პაკეტებს, რომელიც ერთი თვისთვის არის საკმარისი, შეგიძლიათ შექმნათ ისეთი კამპანია, რომელიც განკუთვნილი იქნება ადამიანებისთვის, რომლებმაც 45 დღის წინ შეიძინეს პროდუქცია. ეს ასევე გამორიცხავს ისეთ მომხმარებელს, რომლებმაც 25 დღის წინ გააკეთეს შეკვეთა.
რაც შეეხება CTA-ს, შეგიძლიათ იგივე გამოიყენოთ, რაც კონვერტაციის ეტაპზე:
- შეიძინეთ ახლავე
- მიიღეთ შეთავაზება
- დარეგისტრირდით
- გამოიწერეთ
როგორ გადავიყვანოთ მომხმარებელი ერთი ეტაპიდან შემდეგ ეტაპზე
მომხმარებლების გადაყვანა ფეისბუქ ძაბრის ერთი ეტაპიდან მეორე ეტაპზე ხდება პერსონალიზებული აუდიტორიების შექმნით, რომელიც გამორიცხავს ან აღრიცხავს მომხმარებელს მათი მოქმედებებიდან გამომდინარე.
მაგალითად, კოვერტაციის ეტაპისთვის შეგიძლიათ ისეთი აუდიტორია შექმნათ, რომელიც მოიცავს ისეთ მომხმარებლებს, ვინც უკვე ეწვია თქვენს ვებ-გვერდს და გამორიცხოთ ის ხალხი, ვინც უკვე შეიძინა თქვენგან, რაც საკმაოდ მნიშვნელოვანი პროცესია.
გამორიცხვის ფუნქციის გარეშე, ისე მოხდება, რომ თქვენს რეკლამას მიაწვდით თითოეულ ეტაპზე მყოფ მომხმარებელს, რაც რეალურად არ გჭირდებათ და დამატებით არეულობასაც შეიმოტანს. გარდა ამისა, დამატებით რესურსებს გაფლანგავთ.
არ დაგავიწყდეთ იმ ადამიანების გამორიცხვა, ვინც უკვე კონვერტირებულია, რადგან ისინი შემდეგ ეტაპზე იქნებიან უკვე გადასულები.
დასკვნა
ფეისბუქის რეკლამის ძაბრი საკმაოდ ძლიერი და ეფექტური მარკეტინგული სტრატეგიაა, რომლის მეშვეობითაც თქვენ შეგიძლიათ, მიაღწიოთ ახალ მომხმარებლამდე და მიაწოდოთ მათ საჭირო რეკლამა, საჭირო დროს და გაზარდოთ როგორც თქვენი კონვერტაციის, ასევე გაყიდვების მოცულობაც.
თქვენი ბიზნეს მოდელისა და სამიზნე აუდიტორიის მიხედვით, შესაძლებელია, ბევრი განსხვავებული მიდგომა და განსხვავებული არხებიც დაგჭირდეთ, რათა სხვადასხვა პროდუქტები თუ შეთავაზებები დაარეკლამოთ.
ამ პროცესების მონიტორინგი შესაძლოა, დრო და დრო რთული აღმოჩნდეს, ამიტომაც საგულდაგულოდ დააკვირდით და აღრიცხეთ თითოეული სტადია, რომელსაც მომხმარებელი გადის.
ნებისმიერი კითხვის შემთხვევაში, შეგიძლიათ დაგვიტოვოთ თქვენი კომენტარი და ვეცდებით დაგეხმაროთ.
ასევე დაგაინტერესებთ:
საუკეთესო დრო სოციალურ მედიაში დასაპოსტად
ონლაინ რეკლამირების 6 საუკეთესო სტრატეგია
როგორ გავზარდოთ გაყიდვები სოციალური მედიის დახმარებით
