მედია შესყიდვების პროცესის 3 საფეხური

მარტი 19, 2021

მედია შესყიდვების პროცესის 3 საფეხური

მედია გაყიდვების პროცესი სტრატეგიული, მულტი-პლატფორმული სარეკლამო სივრცის შესყიდვას, მოლაპარაკებებსა და გარიგებებს მოიცავს

რას ეწოდება მედია გაყიდვები

მედია გაყიდვების პროცესი სტრატეგიული, მულტი-პლატფორმული სარეკლამო სივრცის შესყიდვას, მოლაპარაკებებსა და გარიგებებს მოიცავს, რომელიც ყველაზე გამოსადეგი სივრცის მინიმალურ ფასად შეძენაზეა ორიენტირებული.

მედია შესყიდვები ფასიან მედია კატეგორიაში შედის და როგორც წესი, სარეკლამო მასალებისთვის მედია სივრცის შესყიდვას გულისხმობს. მედია სივრცის შესყიდვისას მთავარ მიზანს სწორი ადგილის, დროისა და კონტექსტის მოძებნა წარმოადგენს, რათა სამიზნე აუდიტორიასთან რელევანტური სარეკლამო მასალა იქნას მიწოდებული, გაიზარდოს კონვერსიის მაჩვენებელი და ბრენდის ცნობადობა. მედია შესყიდვები დროზეა დამყარებული, რაც იმას ნიშნავს, რომ მყიდველი მას გარკვეული დროით ქირაობს. შესაბამისად, აუცილებელია, სარეკლამო სივრცე თავისუფალი იყოს მაშინ, როდესაც დამკვეთისთვის მისი შეძენაა საჭირო.

პირველი საფეხური: მოსამზადებელი პერიოდი

სარეკლამო გადაწყვეტილებების მიღება ერთ ღამეში არ ხდება. რეალურად, მოსამზადებელ პერიოდს ყველაზე დიდი დრო მიაქვს, ვინაიდან ამ პროცესში შემსყიდველი სხვადასხვა ალტერნატივებს განიხილავს, გეგმავს და შემდეგ იღებს სარეკლამო გადაწყვეტილებას. პროცესის მთავარია მიზანია, დავრწმუნდეთ იმაში, რომ შერჩეული მედია არხი სარეკლამო ამოცანებთან თანხვედრაშია.

„სარეკლამო წარმომადგენლები, რომლებიც კვლევის ეტაპს აიგნორებენ, ისეთივე სახიფათოები არიან, როგორიც გენერლები, რომლებიც მტრის გაშიფრულ სიგნალებს უგულვებელყოფენ.“ – David Oglivy

განსაზღვრეთ სამიზნე აუდიტორია და გადაწყვიტეთ, როგორ მიაწვდენთ მათ ხმას

პირველ რიგში, შეისწავლეთ სამიზნე აუდიტორია და გაიგეთ, ვინ არიან ისინი. დაყავით თქვენი აუდიტორია კონკრეტულ სეგმენტებად - დემოგრაფიის, ლოკაციის, ინტერესებისა თუ ქცევების მიხედვით. სამიზნე აუდიტორიის გაცნობისა და აღმოჩენის შემდეგ, იფიქრეთ, როგორ მისწვდეთ მათ. სად მიდიან ისინი? სად ვაჭრობენ ისინი - ონლაინ თუ პირდაპირ ადგილზე? თუ ონლაინ რეკლამირებას აპირებთ, მაშინ იფიქრეთ სათანადო არხებზე: საძიებო სისტემებზე, ბლოგ რეკლამირებასა და სხვადასხვა სოციალურ ქსელებზე. დარწმუნდით, რომ იმ არხებს ირჩევთ, რომელსაც თქვენი აუდიტორია იყენებს.

გამოიკვლიეთ კონკურენტები

შეისწავლეთ თქვენი პოტენციური თუ არსებული კონკურენტები და გაეცანით მათ სტრატეგიას. გაიგეთ, თუ სად ათავსებენ ისინი რეკლამებს, ვინ არის მათი სამიზნე აუდიტორია, რამ იმუშავა მათ სასიკეთოდ და ა.შ. კონკურენტებისგან სწავლა დაზოგავს თქვენს დროს და საშუალებას მოგცემთ, უფრო ჭკვიანურად განსაზღვროთ თქვენი სარეკლამო კამპანიები.

შეიმუშავეთ მედია შესყიდვების სტრატეგია

შეარჩიეთ ისეთი სარეკლამო ფორმა, რომელიც თქვენი კამპანიის მიზნებთან იქნება შესაბამისობაში: დაბეჭდეთ რეკლამები ჟურნალებსა და გაზეთებში, გამოიყენეთ ვიდეო სარეკლამო რგოლები ტელევიზიაში, კინოთეატრები, ბილბორდები, რადიო რეკლამა, ბანერები თუ ტექსტები ციფრულ მედიაში და ნუ დაგავიწყდებათ მობილური რეკლამირება. მედია დამკვეთებმა შესაძლოა, სივრცე ერთ არხზე შეიძინონ, ან სულაც სხვადასხვა მედია არხებში და ერთდროულად გაუშვან საკუთარი რეკლამები. თუმცა, ეს შესაძლოა რთული აღმოჩნდეს - თითოეული მედია არხისთვის მასზე მორგებული მესიჯის შემუშავებაა საჭირო. თუ დამკვეთებს სურთ, ონლაინ რეკლამირებას მიმართონ, მაშინ საჭიროა პროგრამული მედია შესყიდვების კონცეფციასაც გაეცნონ.

შეარჩიეთ მედია საშუალებები და დაიწყეთ ფასებზე მოლაპარაკება

რადიო არხებთან ითანამშრომლებთ თუ გამომცემლობასთან, ფასებზე მოლაპარაკება ერთ-ერთი ყველაზე მნიშნველოვანი პროცესია. ეძებეთ საუკეთესო შეთავაზებები და მოითხოვეთ შეღავათები ან ბონუსები. შეადარეთ ერთმანეთს რამდენიმე შეთავაზება და ნუ მოგერიდებათ ფასებზე მოლაპარაკების წამოწყება. თუ ციფრულ მედია საშუალებას შეარჩევთ, მაშინ დარწმუნდით, რომ ზედმეტი, დაფარული გადასახადების გადახდა არ გიწევთ. დააკორექტირეთ პროგრამული ბიუჯეტი მისი ყოველდღიური ან ყოველთვიური ლიმიტებით.

გაანაწილეთ ბიუჯეტი და დაგეგემეთ კამპანიის აღსრულება

მას შემდეგ, რაც განსაზღვრავთ, ვის აწვდით რეკლამას, როგორ და სად, დროა უკვე ფინანსებზეც იფიქროთ და განსაზღვროთ თქვენთვის სასურველი საინვესტიციო უკუგება. გაანაწილეთ კამპანიის ბიუჯეტი თქვენი მიზნების შესაბამისად. გათვალეთ ხარჯები კონკრეტული პერიოდისთვის - დღის, თვის ან კვარტლისთვის. იფიქრეთ, როგორ გაანაწილოთ თქვენი მარკეტინგული ბიუჯეტი სხვადასხვა არხებზე - ოფლაინ და ონლაინ სივრცეში. დაგეგმეთ, როგორ დახარჯავთ თითოეულ ლარს და გაუთვალისწინებელი ხარჯებიც ნუ დაგავიწყდებათ.

მეორე საფეხური: კამპანიის დაწყება

კამპანიის დასაწყისში მედია დამკვეთის მთავარი მოვალეობა კამპანიის ეფექტურობის უზრუნველყოფა და მასზე მონიტორინგია. ამ ეტაპზე, კრიტიკულად მნიშვნელოვანია გაანალიზოთ ის, თუ რა მუშაობს უკეთ და რა არა და შემდეგ, ამ მონაცემებზე დაყრდნობით მიიღოთ სამომავლო გადაწყვეტილებები.

მედიის მიწოდების უზრუნველყოფა

როგორც მედია შემსყიდველი, უნდა დარწმუნდეთ, რომ თქვენი რეკლამა სასურველ ადგილას არის განთავსებული - თქვენი სამიზნე აუდიტორიის წინ, საჭირო ადგილას და საჭირო კონტექსტში. ყურადღება მიაქციეთ, რომ რეკლამა რელევანტურ მესიჯს ავრცელებდეს და ამასთანავე, მუდმივად ადევნეთ თვალი თქვენს პროგრესსა და მომხმარებელთა ჩართულობას.

გამოეხმაურეთ მომხმარებელთა ქცევასა და კონკურენტების აქტივობებს

ზოგჯერ პოტენციური მომხმარებლები რეკლამას ისე არ ეხმაურებიან, როგორც ეს თქვენ გქონდათ დაგეგმილი (არ აკლიკებენ, არ ყიდულებონ ან არ რეგისტრირდებიან). ასეთ შემთხვევაში, მზად უნდა იყოთ სტრატეგიის ცვლილებისთვის, რა თქმა უნდა, მომხმარებლის უკუკავშირის გათვალისწინებით. ამასთან ერთად, თვალი ადევნეთ კონკურენტთა აქტივობებს და მუდმივად გაეცანით ინდუსტრიულ ტრენდებს.

ნუ შეუშინდებით კამპანიის ფარგლებში ბიუჯეტის, მედია საშუალებების ან სხვა პარამეტრების ჩასწორებას, უბრალოდ ამისთვის კონკრეტული ვადა დაუწესეთ საკუთარ თავს. მზად იყავით, რომ პერიოდულად მიმოიხილოთ კამპანია და მისი შედეგები.

მესამე საფეხური: პოსტ-კამპანიის პერიოდი

კამპანიის შემდგომი ეტაპისთვის, საჭიროა იფიქროთ და გაანალიზოთ რეკლამის მიწოდების შედეგები, მისი დადებითი და უარყოფითი მხარეები, მომხმარებელთა ჩართულობა, უკუგება ინვესტიციაზე და საერთო პერფორმანსი.

გაანალიზეთ კამპანიის ეფექტურობა

შეაგროვეთ რაც შეიძლება მეტი მონაცემი და რეგულარულად მიმოიხილეთ სტატისტიკები, მოხსენები და კამპანიის ძლიერი და სუსტი მხარეები. გაანალიზეთ თქვენ მიერ შერჩეული მედია სივრცის ეფექტურობა და ის, თუ რამდენად სასურველ შემოსავლებს აგენერირებს. შეამოწმეთ, როგორ ურთიერთქმედებს მომხმარებელი პროდუქტთან და შეაფასეთ მათი ქცევები. დათვალეთ უკუგება ინვესტიციაზე და ეცადეთ, მაქსიმალურად გამოასწოროთ დაშვებული შეცდომები და შემდგომშიც თავიდან აირიდოთ ისინი.

შეაგროვეთ მონაცემები

როდესაც ყველა შესაძლო მონაცემი გექნებათ შეგროვებული, დროა მათი გამოყენებაც დაიწყოთ. ციფრულ რეკლამირებაში მონაცემები ალგორითმების ასაგებად გამოიყენება, რაც თავის მხრივ, სარეკლამო კამპანიების ოპტიმიზაციასა და სასურველი შედეგების მიღებაში გვეხმარება. მონაცემები მარკეტოლოგთა საუკეთესო მეგობრები არიან, ამიტომ მათ სიფრთხილით უნდა მოეკიდოთ. მათზე დაყრდნობით ეცადეთ მთავარი ტრენდები განსაზღვროთ, იპოვოთ მათ შორის კავშირი და კანონზომიერებების ლოგიკა. რაც მთავარია, შეხედეთ მონაცემებს სხვადასხვა კუთხიდან და ეცადეთ, მის გასაანალიზებლად სხვებიც მოიშველიოთ და იმსჯელოთ.

ციფრული მედია ოპტიმიზიაცია

რეკლამირება გაცილებით მეტია, ვიდრე მხოლოდ ბანერის შექმნა. ბრენდმა შესაძლოა მსოფლიოში ყველაზე მიმზიდველი, შესანიშნავი რეკლამა შექმნას, თუმცა ის სრულიად გამოუსადეგარი იყოს და ვერავინ შეამჩნიოს. ეს რომ თავიდან აირიდოთ, გჭირდებათ ისეთი აუდიტორია, რომელიც ყველაზე მეტად იქნება დაინტერესებული ამ რეკლამით.

„კრეატივს, სტრატეგიის გარეშე ხელოვნება ეწოდება. კრეატივს, სტრატეგიასთან ერთად კი რეკლამირება“ – Jef I.Richards

წარმატებული რეკლამირება მხოლოდ იმაზე არ არის დამოკიდებული, თუ რისი ჩვენება ხდება და როგორ, არამედ იმაზეც, თუ ვისთვის არის ის განკუთვნილი. სწორედ ამიტომ, მედია შესყიდვები კრიტიკულად მნიშვნელოვანია. სივრცე, სადაც რეკლამირება ჩნდება, გადამწყვეტ როლს თამაშობს სრულიად სარეკლამო კამპანიისთვის და შედეგად მოაქვს სასურველი შემოსავლები ან სრულიად არაფერი.

თუმცა, ამავდროულად მედია შესყიდვების პროცესი საკმაოდ შრომატევადია და დიდი დროც სჭირდება. არავის სურს, მისი მარკეტინგული ბიუჯეტი ფუჭად დახარჯოს და შედეგები ვერ მიიღოს. შედეგად, კამპანიის წარმატება სარეკლამო სივრცეზე და მის გამჟღავნებაზეა დამოკიდებული. როდესაც მედია სივრცეს ყიდულობთ, იფიქრეთ თქვენს ამოცანებზე და შეარჩიეთ სწორი არხი თქვენი მარკეტინგისთვის.

დღესდღეობით, მარკეტოლოგთა უმრავლესობა ციფრულ მედიას უთმობს მსხვილ ბიუჯეტს, ვინაიდან მომხმარებლები ყველაზე დიდ დროს ონლაინ სივრცეში ატარებენ. ინტერნეტი არის ის ადგილი, სადაც თქვენი სამიზნე აუდიტორია იყრის თავს. საბედნიეროდ, პროგრამული რეკლამირება საშუალებას გაძლევთ სრული სიზუსტით მიწვდეთ სამიზნე აუდიტორიის თითოეულ წევრს, თანაც სხვადასხვა პლატფორმასა თუ არხზე.