როგორ შევქმნათ ძლიერი ინფლუენსერ მარკეტინგის სტრატეგია

თებერვალი 28, 2021

როგორ შევქმნათ ძლიერი ინფლუენსერ მარკეტინგის სტრატეგია

ადამიანები არ ყიდულობენ პროდუქტს და სერვისს. ისინი ყიდულობენ ურთიერთობას, ამბავს და სასწაულს

მარკეტინგის გურუს, სეთ გოდინის, სიტყვებით:

ადამიანები არ ყიდულობენ პროდუქტს და სერვისს. ისინი ყიდულობენ ურთიერთობას.“

მარკეტინგის გარშემო ერთ დროს ყველაფერი მაგიური იყო. კონცეფციითა და სტრატეგიით დაწყებული, შექმნითა და შესრულებით დამთავრებული.

ოდესღაც რთული იყო ღირსეული ვენდორის პოვნა, რომელსაც შეეძლო მაღალი ხარისხის რეკლამების წარმოება და გაშვება. ახლა კი ისე, როგორც არასდროს, ეს ყველაზე იაფი, მარტივი და ხელმისაწვდომია.

უხეშად რომ ვთქვათ, რეკლამირების მაგიურობა ნელ-ნელა ქრება.

ყურადღების მოთხოვნის ზრდამ და უამრავი პროდუქტის შეთავაზებამ გამოიწვია მომხმარებლების დაბნეულობა, თუ ვის შეიძლება ენდონ და ვის არა. ისინი უფრო მეტი სიხშირით ბლოკავენ რეკლამებს. უფრო და უფრო მეტ ზომებს იღებენ, რომ რეკლამებს თავი აარიდონ, რაც ბრენდებისთვის არც თუ ისე სასიამოვნო ფაქტია.

ჭკვიანური სვლა ინფლუენსერებზე გადასვლაა.

თუ თქვენ გსურთ, მომხმარებლების ყურადღება მიიპყროთ, მიმართეთ ისეთ ადამიანს ვინც უკვე მათი ყურადღების ცენტრშია.

გადახედეთ ამ მონაცემებს და მიხვდებით, რამდენად მნიშვნელოვანი ელემენტი ხდება ინფლუენსერ მარკეტინგი:

  • მილენიელების მხოლოდ 1% ენდობა რეკლამებს. 33% კი ბლოგის შეფასებების მიხედვით ყიდულობს პროდუქტს.
  • ადამიანების დაახლოებით 40%-მა განაცხადა, რომ ინფლუენსერების მიერ გამოყენებული პროდუქტი შეიძინა, რომელიც ნახა YouTube-ზე, Instagram-ზე, ან Twitter-ზე.
  • ინფლუენსერების 71% მიიჩნევს, რომ ადამიანებთან კავშირს გულწრფელობისა და ავთენტურობის საშუალებით ამყარებენ.
  • Tomoson კვლევის მიხედვით, ინფლუენსერ მარკეტინგში დახარჯულ 1 ყოველ დოლარს 6.50$ მოაქვს.

 

რა არის ინფლუენსერ მარკეტინგი?

ინფლუენსერ მარკეტინგი იყენებს არსებულ ინფლუენსერებს, რომლებმაც უკვე შეიქმნეს ძლიერი იმიჯი და რეპუტაცია კონკრეტული ნიშის მიმართულებით და ჰყავთ დიდი რაოდენობის მიმდევრები, იმისთვის რომ გააძლიეროს ბრენდი, გაყიდოს პროდუქტი და მათთან ერთად შექმნას კონტენტი. 

ინფლუენსერობა ნიშნავს კავშირს და დღეს მარკეტინგის მთავარი ამოცანა პროდუქტის პრომოციაა მომხმარებლებთან კავშირის დამყარების გზით.

ინფლუენსერ კამპანიების ტიპები

  1. ფასდაკლების კოდები და ეფილიეიტ მარკეტინგი

ცნობილი მაგალითია, Audible-ის პარტნიორობა New York Times-ის ბესთსელერ ავტორთან და ინვესტორთან ტიმ ფერისთან.

პოდკატის მსვლელობის დროს, Tim Ferriss Show, ტიმი 30 წამს უთმობს Audible-თან პარტნიორობაზე საუბარს და ამისამართებს მომხმარებლებს კონკრეტულ ბმულზე, სადაც ისინი უფასოდ იღებენ ელექტრონულ წიგნს და ტიმის საყვარელი წიგნების ჩამონათვალს.

ინფლუენსერ მარკეტინგის ეს ტაქტიკა შესანიშნავი ბალანსია Audible-ს სპონსორობის და ტიმის თავისუფალ არჩევანს შორის, თუ რომელი წიგნი ურჩიოს მსმენელს. 

  1. კონკურსები და საჩუქრები

შეჯიბრებები, საჩუქრები და კონკურსები ბრენდის გაძლიერების, ჩართულობის და აურზაურის გამოწვევის ძლიერი ხერხია.

მარტივად შეგიძლიათ, კონკურსების გამარჯვებულებს უფასოდ გადასცეთ თქვენი პროდუქტები ან პირდაპირ ინფლუენსერებს აჩუქოთ პრომოციის სანაცვლოდ.

საჩუქრების გახსნის პროცესის YouTube არხზე ან Instagram ლაივ ვიდეოში ჩვენება მიზნობრივი აუდიტორიისთვის გაყიდვების გაზრდას გამოიწვევს, თანაც თქვენგან მინიმალური დანახარჯებით.

იდეალურ შემთხვევაში, ეს საჩუქრები ხალხში აღფრთოვანებას უნდა იწვევდეს, მათთვის შესაძლებელია წინასწარი წვდომის მინიჭება, რომ შეიძინონ პროდუქტი, სანამ ის მასობრივ გაყიდვაში ჩაეშვება.

შეჯიბრებების დროს მარტივია, გამოიწვიო დიდი ჩართულობა, მაგალითად:

  • მეგობრის დათაგვა
  • პოსტის მოწონება
  • გამოწერა
  • კონტენტის გაზიარება
  • ახალი ამბების გამოწერა
  • ორიგინალი კონტენტის შექმნაც კი.

დარწმუნდით, რომ შეჯიბრის წესები ყველასთვის ნათელი და გასაგებია. მონაწილეების ყველა შეკითხვას უნდა გაეცეს პასუხი და არც ერთმა ნიუანსმა არ გამოიწვიოს დაბნეულობა, ასეთ შემთხვევაში გამარჯვებულის გამოცხადებისას დანარჩენი მონაწილეები უკმაყოფილოები არ დარჩებიან.

როგორ ქმნით ინფლუენსერ მარკეტინგის სტრატეგიას?

ინფლუენსერ მარკეტინგის სტრატეგიის შექმნა მთლიანად ორიენტირებულია მიზნების სწორად დასახვაზე.

მკაფიო დანიშნულების ადგილის გარეშე ვერ გაიგებთ სწორ გზას ადგახართ თუ არა.

მნიშვნელოვანია განსაზღვროთ მიზნები, KPI-ები და მთელი ძალისხმევით გაეცნოთ ინფლუენსერების ლანდშაფტს.

  1. განსაზღვრეთ მიზნები და KPI-ები

პირველად, როდესაც ბრენდები ინვესტიციას დებენ ინფლუენსერ მარკეტინგში მათ თავი აზარტული თამაშის მონაწილედ შეიძლება იგრძნონ, რადგან შესაძლოა მათ ვერასდროს დააგენერირონ ROI.

ეს ნაწილობრივ, იმიტომ ხდება, რომ ისინი საჭირო რესურსებს არ დებენ ამ არხში და ნაწილობრივ იმიტომ, რომ ისინი შესაბამის დროს არ უთმობენ მკაფიო მიზნების დასახვას და სწორი საზომების დადგენას, რაც ზუსტად უჩვენებთ მიაღწიეს თუ არა მიზნებს.

ინფლუენსერ მარკეტინგის სამი ძირითადი მიზანია:

  • ბრენდის ცნობადობის გაზრდა. ონლაინ ბრენდის შექმნის წარმატების საზომი ერთეულები შეიძლება იყოს ფოლოვერების ზრდა, მოწონებები, ჩართულობა (კომენტარები), ჰეშთეგების გამოყენება და გაზიარებები.
  • ახალი მიზნობრივი ბაზრის მოზიდვა. ახალი სამიზნე ბაზრის მიგნება მოიცავს ყველაფერს, რაც ბრენდის ცნობადობის გაზრდას ან პროდუქტის ახალი აუდიტორიისთვის წარდგენას ეხება. ასეთ შემთხვევაში გჭირდებათ ისეთი ინფლუენსერი, რომელიც მიზნობრივ ტრაფიკს მოგიყვანთ.
  • ლიდების მოპოვება. ლიდების მოპოვების მთავარი მიზანი გაყიდვების გაზრდაა. ლიდების და ახალი მომხმარებლების დანახვა ძალიან მარტივია კონვერტაციებით და გაყიდვებით. მაგრამ, რთული იქნება შედეგების გაზომვა, თუ არ გამოიყენებთ ლენდიგნ გვერდებს და კონკრეტულ კოდებს ყველა ინფლუენსერისთვის.

მას შემდეგ, რაც განსაზღვრავთ მიზნებს, ყურადღება გადაიტანეთ იმაზე, თუ როგორ უნდა გაზომოთ ინფლუენსერ მარკეტინგის კამპანიის ROI.

ხომ უნდა იცოდეთ, რომელი პარტიონორობა მუშაობს და რომელი არა იმისთვის, რომ მაქსიმალური სარგებელი მიიღოთ ინფლუენსერ მარკეტინგის კამპანიიდან.

შეადარეთ ინფლუენსერ მარკეტინგის კამპანია სხვა მარკეტინგული არხების შედეგებს და ნახავთ, ღირს თუ არა ინფლუენსერებში ბიუჯეტის ინვესტირება.

  1. გაეცანით ინფლუენსერების ლანდშაფტს

ეფექტური ინფლუენსერ მარკეტინგული კამპანიის უმნიშვნელოვანესი კომპონენტია ნდობაზე დაფუძნებული თანამშრომლობა და რელევანტური ინფლუენსერის მოძიება, რომელსაც თავისი აუდიტორია ენდობა და შეუძლია, მათ ყიდვის გადაწვეტილებისკენ უბიძგოს. 

გაფართოვდით Instagram-ის მიღმაც.

მთავარი მიზანი ისეთი ინფლუენსერების აღმოჩენაა, რომელიც თქვენთვის რელევანტურ აუდიტორიაზე მუშაობს თემებისა და დემოგრაფიის მიხედვით და რომელსაც შეუძლია ჩართულობა და აქტიურობა გამოიწვიოს თქვენი პროდუქტის გარშემო. 

თქვენი ბრენდისთვის ისეთი ინფლუენსერი უნდა იპოვოთ, რომელიც შეესაბამება ბრენდის ხედვას, მისიას და იდენტობას.

Instagram პირველი პლატფორმაა, რომელიც ყველას ახსენდება, როცა საქმე ინფლუენსერებს ეხება.

სანამ ინვესტიციას ინსტაგრამში ჩადებთ, კარგად გადახედეთ სხვა პლატფორმებსაც, რადგან ბოლო წლების განმავლობაში ლანდშაფტი რადიკალურად იცვლება და თითქმის ყველა სოციალური პლატფორმა შესაძლებლობებითაა სავსე. ესენია: Facebook, TwitterPinterest, Snapchat და YouTube.

წადით იქ, სადაც თქვენი სამიზნე აუდიტორია აქტიურია და იქ ეძებეთ ინფლუენსერები.

მიკრო ინფლუენსერების წამოწევა

ინფლუენსერების გავლენა უფრო და უფრო იზრდება, ასევე იზრდება კონკურენციაც, რას იმას ნიშნავს, რომ ჩვენ ყველა დონეზე შეგვიძლია ინფლუენსერების ნახვა - დაწყებული მაღალი დონის დიდი რაოდენობის გამომწერებით, დამთავრებული დაბალი დონის მცირე რაოდენობის გამომწერებით.

ბრენდები, თავის მხრივ, უფრო სპეციფიურ ინფლუენსერებს ეძებენ, ე.წ. მიკრო ინფლუენსერებს, რომლებიც ორიენტირებულები არიან კონკრეტულ ნიშაზე და საბაზრო სეგმენტზე.

საიდუმლო არაა, რომ რაც უფრო დიდია ინფლუენსერი, ჩართულობა უფრო ნაკლები აქვს.

ისინი ვისაც 1000 მიმდევარი ყავს პოსტების 8%-ზე აგროვებენ ყველა მათგანის მოწონებას, მაშინ როდესაც 10 მილიონი მიმდევარის მქონე ინფლუენსრების მოწონებები 1.6%-ს შეადგენს.

გარდა მიმდევრების რაოდენობისა, მნიშვნელოვანია მონიტორინგი გაუწიოთ, თუ რა სახის მიმდევრები ჰყავთ, როგორი ურთიერთობა აქვთ მათთან და როგორია მიმდევრების ჩართულობა მათ პოსტებზე.

ინფლუენსერ მარკეტინგის ასეთი გავლენის ფონზე, გასაკვირი არ არის, რომ მალე შემოვა ისეთი ინსტრუმენტები, რომლის დახმარებით ბევრი ისეთი მნიშვნელოვანი დეტალის გაზომვა იქნება შესაძლებელი, რაც ახლა სირთულეს წარმოადგენს.

Linqia-ს 2018 წლის კვლევის მიხედვით, პროფესიონალების 78% ამბობდა, რომ ინფლუენსერ მარკეტინგის ROI-ს გამოთვლა მათთვის დიდ გამოწვევას წარმოადგენდა.

45% ამბობდა, რომ ინფლუენსერ მარკეტინგის პროვაიდერის არჩევა პრობლემას იყო.

იმისათვის, რომ ეს პრობლემები თავიდან აირიდოთ, სწორი ინსტრუმენტებით უნდა ეძებოთ ინფლუენსერები. მოძებნოთ მათი საკონტაქტო ინფორმაციები და შეადგინოთ რელევანტური სია.

გახსოვდეთ, ინფლუენსერებს სამართლიანი კომპენსაცია უნდა შესთავაზოთ. დიდი ხნის განმავლობაში ინფლუენსერები არ იღებდნენ სამართლიან შეთავაზებებს.

TapInfluence and Altimeter-ის კვლევის მიხედვით, არაადეკვატური კომპენსაციების გაცემა ბრენდების მხრიდან დიდ შეცდომას წარმოადგენდა. დღეს უკვე მარკეტოლოგებს 48% მზადყოფნას გამოთქვამს, რომ ინფლუენსერ მარკეტინგის ბიუჯეტი გაზარდონ.

კომპენსაციის ზომა დამოკიდებულია პარტნიორობის პირობებზე, პროექტის სიდიდეზე, მიმდევრების რაოდენობასა და ხარისხზე და შეთანხმების ხანგრძლივობაზე. ზოგი ინფლუენსერი კმაყოფილდება საჩუქრების მიღებით, რომლებსაც თავიანთ პლატფორმაზე პრომოციას გაუკეთებენ. ზოგს ეფილიეიტის პროგრამის ფარგლებში ურჩევნიათ პარტნიორობა. თუმცა, ყველაზე პოპულარული ერთჯერადი და ყოველთვიური საფასურის მიღებაა.

  1. ინვესტიცია ჩადეთ ინფლუენსერებში რომლებიც იყენებენ ვიდეოებს

ვიდეოს წარმოება ყველაზე ეფექტური ხერხია ყველაფრისთვის. თუ ამ არხს არ მიყვებით, მაშინ ერთი ნაბიჯით უკან ხართ.

როდესაც ყიდვაზე გადაწყვეტილებებს იღებენ, 5-დან 4 მილენიალი პირველ რიგში ვიდეოებს უყურებს.

როცა საქმე ვიდეო კონტენტის ზრდას ეხება, ბრენდები უამრავ ფულს ხარჯავენ YouTube-ზე ძირითადად იმიტომ, რომ ვერ აკონტროლებენ როდის გამოჩნდება რეკლამა და როდის არა.  

კონტროლის მექანიზმის არ ქონის გამო, ბრენდები უკვე ამჯობინებენ იმ ინფლუენსერებში ჩადონ ინვესტიცია, რომლებიც ვიდეო კონტენტს აწარმოებენ.

ასეთი ვიდეოები შეიძლება იყოს პროდუქტის ტიზერის კამპანია, პროდუქტის გახსნის პროცესი, პროდუქტის მიმოხილვა და ა.შ.  

კვლევის მიხედვით, რომელიც გასულ წელს ჩატარდა ინფლუენსერების 12% ორიენტირებულია YouTube არხზე, როდესაც 2017 წელს მხოლოდ 3%-ს წარმოადგენდა ეს მაჩვენებელი. 

კიდევ უფრო საინტერესოა ის ფაქტი, რომ თინეიჯერების 70%-ისთვის მათი საყვარელი YouTuber-ები უფრო დიდი პოპულარობით სარგებლობენ, ვიდრე მსოფლიოში ცნობილი ვარსკვლავები. გამომწერების 60% კი ითვალისწინებს იმ რჩევებს, რომლებსაც საყვარელი YouTuber-ებისგან იღებენ.  

წარმოიდგინეთ, 5-10 წელიწადში ეს თინეიჯერები დასაქმებულთა ბაზარს რომ შეუერთდებიან და თქვენი პირდაპირი სამიზნე აუდიტორია გახდებიან, რამდენად მნიშვნელოვანი იქნება თქვენი ბრენდის მიმართ მათი ლოიალობა.

სოციალური მედია ვიდეო მარკეტინგის დიდ შესაძლებლობებს იძლევა. Instagram-ს აქვს ლაივ ვიდეობი და არც თუ ისე დიდი ხნის წინ გაეშვა Instagram TV (IGTV), რაც პოპულარული ინსტაგრამ ინფლუენსერებისთვის ცალკე არხს წარმოადგენს.

  1. გაზარდეთ გამჭვირვალობა

2017 წლიდან ბრენდები ვალდებულები გახდნენ, თავიანთი სამსახურეობრივი ურთიერთობები ინფლუენსერებთან უფრო გამჭვირვალე გამხდარიყო. 

მთავრობის ამ მოთხოვნამ ბრენდები აიძულა, უფრო დეტალური და მკაფიო პირობები გაეწერათ ინფლუენსერებისთვის.

ერთ-ერთი ყველაზე მარტივი გზა, რომ ბრენდისა და ინფლუენსერის პარტნიორობა ყველასთვის ნათელი ყოფილიყო, ინფლუენსერების პოსტებზე #sponsored, #ad, ან #[ბრენდის სახელი] წარწერების გაჩენა იყო.

Instagram-მა კიდევ უფრო წინ გადადგა ნაბიჯი და ცალკე გამოყო დაბრენდილი კონტენტის ფუნქცია, რომლის საშუალებითაც შეგიძლიათ, მონიშნოთ თქვენი პარტნიორი ბრენდი და ნათლად აჩვენოთ რომ კონკრეტული პოსტი დასპონსორებულია. 

რისკების შემცირების მიზნით, რეკომენდირებულია ხშირად შეამოწმოთ თქვენი ინფლუენსერების პოსტები.

  1. შექმენით ღირებული კონტენტი რეკლამების ნაცვლად

კონტენტ მარკეტინგის წარმოშობა ხალხისგან ავთენტურობის მოთხოვნამ განაპირობა. მომხმარებლებს ყელში აქვთ ტრადიციული რეკლამების მოსმენა და ყურება ტელევიზორში, რადიოში, ჟურნალებში, ბილბორდებზე და ა.შ.

ამის გათვალისწინებით, როდესაც ირჩევთ ინფლუენსერს დარწმუნდით რომ მათ აქვთ დაცული ბალანსი შემოსავლის მქონდე კონტენტსა და არა-შემოსავლის მქონე კონტენტს შორის.  წინააღმდეგ შემთხვევაში ნდობის ფაქტორი იკლებს.

 ორი რამ, რაც ძალიან მნიშვნელოვანია, არის თანმიმდევრულობა და გულწრფელობა. რაც უფრო საპრომოციო ხასიათისაა კონტენტი, უფრო არაეფექტური იქნება კამპანია“. - დევიდ ზენგი.

წარმატებული ინფლუენსერ მარკეტინგის კამპანიების მაგალითები

  1. Bigelow Tea

Bigelow Tea არის ერთი-ერთი ყველაზე ცნობილი და აღიარებული ბრენდი ჩაის ინდუსტრიაში.

ბევრი სხვა ბრენდის მსგავსად, Bigelow Tea იბრძვის იმისთვის, რომ შეინარჩუნოს მომხმარებლები და ბრენდის პოზიციონირება ასეთი მაღალი დინამიკის მქონე მარკეტინგის პირობებში.

ჩაის და ყავის სახლების ყველა კუთხეში გამოჩენამ და სოციალური მედიის მარკეტინგის ზრდამ, Bigelow-ს გადააწყვეტინა, რომ ადაპტირება მოეხდინა თანამედროვე დროში და რამით განსხვავებული ყოფილიყო.  

ამისათვის, კომპანიამ აირჩია ინფლუენსერ მარკეტინგი, რომლის საშუალებითაც პრომოციის გაკეთება სურდათ თავიანთი ჩაისთვის და ჯანსაღი ცხოვრების სტილისთვის.

კომპანია დაუპარტნიორდა ცნობილ ბლოგერს, რომელმაც თავის მიმდევრებს გაუზიარა Bigelow-ს ცივი ჩაის რეცეპტი ლიმონათის ყინულის კუბიკებით.

ამ სტატიის საშაულებით Bigelow მოექცა Google-ის ძებნის პირველივე გვერდზე, როდესაც მომხმარებლები ეძებნენ „ცივი ლიმონათის სასმელს“ „ცივ ჩაის“ და მსგავს რელევანტურ პროდუქტს. Bigelow ამ კამპანიით გაცდა ინფლუენსერის მიმდევრებს და უფრო დიდ აუდიტორიაზე შეძლო გასვლა.

ინფლუენსერის კამპანიამ დააგროვა 32,000+ ჩართულობა, 44  მილიონი შთაბეჭდილება (impressions) და გაზარდა ჩაის გაყიდვები 18.5%-ით.

Bigelow Tea-მ წარმატებით გამოიყენა ინფლუენსერების ძალა და მილენიალების აუდიტორიისთვის საყვარელი ბრენდი გახდა.

  1. Turkish Airlines

ინფლუენსერ კამპანიის მიზანი მხოლოდ გაყიდვების გაზრდას არ წამოადგენს. ის შესანიშნავი ხერხია ბრენდის ცნობადობის ასამაღლებლად და ჰუმანიტარული, არაკომერციული მიზნებისთვის.

სომალის კრიზისმა მილიონობით ადამიანი დატოვა საკვებისა და წყლის გარეშე.

Snapchat-ის ვარსკვლავი და ინფლუენსერი Jérôme Jarre დაუპარტნიორდა თურქეთის ავიახაზებს, რომელიც ერთადერთი საერთაშორისო ავიახაზი აღმოჩნდა, რომელიც სომალის მიმართულებით დაფრინავს, იმ მიზნით, რომ ჰუმანიტარული დახმარება გაეწია დაზარალებულთათვის.

Jérôme - მ გაზარდა ცნობადობა ჰეშტეგის #TurkishAirlinesHelpSomalia გამოყენებით და გაავსო მთელი თვითმფრინავი საკვებითა და წყლით.

რამდენიმე დღეში Jérôme-ის პოსტმა Twitter-ზე დააგროვა 83,000+ რეპოსტი და  58,000+ მოწონება Instagram-ზე.

სხვა ინფლუენსერების დახმარებით 24 საათში სომალისთვის 1 მილიონი დოლარის შეგროვება შეძლო.

კამპანიამ პირველივე 5 დღეში 2 მილიონი დოლარის მობილიზება შეძლო 80,0000 შემომწირველისგან.

ამ ფულით, მან მხოლოდ 1 თვითმფრინავი არ გაავსო საკვებითა და წყლით, როგორც ის თავდაპირველად გეგმავდა, მან 10 ასეთი თვითვმფრინავის გაგზავნა შეძლო სომალში.

შემდეგი 6 თვის განმავლობაში, თურქეთის ავიახაზებმა 200 ტონა საკვებით უზრუნველყო სომალი.

გარდა იმისა, რომ თურქეთის ავიახაზების გაყიდვები გაიზარდა, მისი ბრენდის რეპუტაციაც გაძლიერდა და ის ჰუმანიტარული ქმდება, რაც მათ განახორციელეს, რა თქმა უნდა, ფასდაუდებელია.

  1. GOODFOODS

GOODFOODS არის ნატურალური, ეკო-მეგობრული საკვების მწარმოებელი კომპანია, ცნობილი თავისი გუაკამოლით, ხემსებით, სალათებითა და სასმელებით. 

კომპანიას სურდა, გაეზარდა ბრენდის ცნობადობა და გაყიდვები.

ამისათვის, ის დაუპარტნიორდა 60 ინფლუენსერს, ვინც მუშაობდა საკვების, სახლის, მშობლების ცხოვრების სტილის მიმართულებით, იმისათვის, რომ ეწარმოებინათ კონტენტი, სადაც GOODFOOD-ის რეცეპტების მიხედვით დაამზადებნენ საკვებს.

ეს ინფლუენსერ კამპანია სამი ნაწილისგან შედგებოდა:

  1. თამაშის დღის ტრადიციები
  2. მადლიერების დღის აღნიშვნა
  3. შობის და ჰანუქას (რელიგიური დღესასწაული) აღნიშვნა

თითოეულ რეცეპტზე დაკლიკების შემთხვევაში მომხმარებელი გადადიოდა GOODFOOD-ის ლენდინგ გვერდზე, სადაც იქ კონკრეტული საკვები ხვდებოდა და შეეძლოთ ადგილობრივი საცალო მოვაჭრისგან შეეძინათ პროდუქტი. 

საბოლოოდ, ინფლუენსერებმა 2000 ორიგინალი კონტენტი შექმნეს, რომელიც მოიცავდა რეცეპტებს, ფოტოებს, ისტორიებს, სოციალური მედიის პოსტებს და ვიდეოებს.

კონტენტმა დააგენერირა 70,450 ონლაინ ჩართულობა მოწონებებით, კომენტარებითა და გაზიარებებით.

კამპანიას ჰქონდა საოცარი კონვერტაციის მაჩვენებელი, საშუალოდ 34,2%-44.5% პლატფორმების მიხედვით.

დასკვნა

ციფრული სამყარო ძალიან სწრაფად იცვლება და ის, ვინც არასწორად ხარჯავს ბიუჯეტს, კარგავს მომხმარებლებს და საბაზრო წილს.

საბედნიეროდ, ინფლუენსერ მარკეტინგი ჯერ კიდევ დიდი ხნის განმავლობაში შეინარჩუნებს პოპულარობას.

სანამ ინფლუენსერს შენარჩუნებული აქვს სოლიდური რეპუტაცია და გულწრფელი ურთიერთობა მიმდევრებთან, მაშინ გამომწერების რაოდებობას დიდი მნიშვნელობა აღარ აქვს. რეალურად მნიშვნელოვანია, რომ მისი აუდიტორია ითვალისწინებდეს მათ რჩევებსა და რეკომენდაციებს. 

 

ასევე დაგაინტერესებთ:

ვინ არიან ინფლუენსერები?

ინფლუენსერ მარკეტინგის წარმატებული კამპანიის მაგალითები

ინფლუენსერ მარკეტინგის 7 საუკეთესო ხერხი ბრენდის გაძლიერებისთვის