ვინ არიან ინფლუენსერები?

ინფლუენსერი არის ადამიანი, ვისაც აქვს:

• ძალა, ავტორიტეტი, ცოდნა და გავლენა იმისთვის, რომ ადამიანებს ყიდვის გადაწყვეტილებისკენ უბიძგოს.
• აქტიური კომუნიკაცია თავის გამომწერებთან. გამომწერების რაოდენობა განისაზღვრება ინფლუენსერის გავლენითა და ნიშით.

მნიშვნელოვანია იცოდეთ, რომ ეს ადამიანები არ არიან მარკეტინგის ხელსაწყოები. მათ აქვთ ათასობით ადამიანთან მჭიდრო ურთიერთობა და ბრენდებს შეუძლიათ ითანამშრომლონ მათთან მარკეტინგული მიზნების მისაღწევად. 

ვინ არიან სოციალური მედიის ინფლუენსერები?

ბოლო ათწლეულების მანძილზე სოციალური მედიის გავლენა საგრძნობლად გაიზარდა. 2019 წლის იანვრის We Are Social - ის კვლევის მიხედვით 3.484 მილიარდი ადამიანია აქტიური სოციალურ მედიაში. მსოფლიოს მოსახლეობის 45% იყენებს სოციალურ მედიას.

სოციალური მედიის ინფლუენსერები არიან ადამიანები, რომლებმაც კონკრეტული თემის შესახებ თავიანთი ცოდნით გაითქვეს სახელი. ისინი რეგულარულად პოსტავენ ამ თემის შესახებ და გარშემო იკრებენ მიმდევრებს, რომლებიც ენდობიან მათ და აინტერესებთ მათი კონტენტი.

ბრენდებს უყვართ სოციალური მედიის ინფლუენსერები, რადგან მათ აქვთ უნარი, დაამოტივირონ თავიანთი გამომწერები პროდუქტის შეძენასთან დაკავშირებით.

ინფლუენსერების ტიპები

ინფლუენსერების დაყოფა შეგიძლიათ რამდენიმე მახასიათებლის მიხედვით. ყველაზე გავრცელებული მახასიათებელი კონტენტის ტიპისა და გავლენის დონის მიხედვით არსებული გამომწერების რაოდენობაა. ინფლუენსერების დაჯგუფება თავიანთი ნიშის მიხედვითაც შეიძლება. შესაძლოა, ინფლუენსერი არც თუ ისე გავლენიანად ითვლებოდეს, რადგან დაბალი კატეგორიის ნიშაზე მუშაობდეს, მაგრამ ეს იმას არ ნიშნავს, რომ ის ნაკლები შედეგის მომტანი იქნება. მაგალითად, ბევრი ცნობილი ადამიანია დღეს ინფლუენსერი, თუმცა ყიდვის გადაწყვეტილების მიღებაზე დიდ გავლენას შესაძლოა ვერ ახდენდეს, რადგან ისინი არ ითვლებიან კონკრეტული ნიშის მცოდნე ადამიანებად. ზოგ მიკრო და ნანო ინფლუენსერს კი შესაძლოა უდიდესი გავლენა ქონდეთ თავიანთ მიმდევრებზე, რადგან მათ ნდობა აქვთ მოპოვებული იმ თემასთან დაკავშირებით, რაზეც კონტენტს ქმნიან. ასეთ ინფლუენსერებს მნიშვნელოვანი სარგებლის მოტანა შეუძლიათ კომპანიებისთვის, რომლებსაც მათი მიზნობრივი აუდიტორია სჭირდებათ პროდუქტის გასაყიდად.

ინფლუენსერები გამომწერების რაოდენობის მიხედვით

მეგა-ინფლუენსერები

მეგა ინფლუენსერებს 1 მილიონზე მეტი გამომწერი მაინც ჰყავთ სოციალურ ქსელში. მათი მიმდევრები ერთ კონკრეტულ სამიზნე აუდიტორიას არ წარმოადგენენ.

ბევრი მეგა ინფლუენსერი ცნობადი სახეა, რომელმაც პოპულარობა ფილმების, მუსიკის, სპორტის, სატელევიზიო შოუების ან სხვა საშუალებით მოიპოვა. ასეთ ინფლუენსერებთან ძირითადად დიდი ბრენდები თანამშრომლობენ. თითქმის ყველა მეგა ინფლუენსერს თავისი აგენტი ჰყავს, რომელიც მათ ნაცვლად მონაწილეობს ბრენდებთან მარკეტინგულ შეთანხმებებში.

მაკრო-ინფლუენსერები

მარკო ინფლუენსერები ერთი ნაბიჯით ქვემოთ არიან მეგა ინფლუენსერებთან შედარებით და უფრო ხელმისაწვდომები არიან ინფლუენსერ მარკეტოლოგებისთვის. მაკრო ინფლუენსერებს საშუალოდ 40,000-დან 1 მილიონამდე მიმდევარი ჰყავთ. ეს ჯგუფი ორი ნაწილისგან შედგება. ისინი შესაძლოა იყვნენ B კატეგორიის ცნობადი სახეები, რომლებიც ჯერ არ არიან მსოფლიო დონის ვარსკვლავები ან წარმატებული ონლაინ ექსპერტები თავიანთ ნიშაში. მაკრო ინფლუენსერები დიდი პოპულარობით სარგებლობენ და ბრენდის ცნობადობის ასამაღლებლად კარგ წყაროს წარმოადგენენ. მაკრო ინფლუენსერები უფრო მეტნი არიან ვიდრე მეგა ინფლუენსერები და ბრენდებისთვის მათი პოვნა და მათთან კომუნიკაცია გაცილებით მარტივია.   

მიკრო-ინფლუენსერები

მიკრო ინფლუენსერები ჩვეულებრივი ადამიანები არიან, რომლებიც ცნობილები გახდნენ კონკრეტული თემის ცოდნით. მათი მიმდევრებიც სწორედ ის ადამიანები არიან, ვისაც აინტერესებთ ეს კონკრეტული ნიშა, ენდობიან კონკრეტულ ინფლუენსერს ამ საკითში და გამოირჩევიან აქტიური კომუნიკაციითა და ინტერაქციით.

მიკრო ინფლუენსერების მიმდევრების რაოდენობა 1000-დან 40000-მდე მერყეობს ერთ სოციალურ ქსელში.  იმისათვის, რომ მიკრო ინფლუენსერებმა კომპანიასთან თანამშრომლობა დაიწყონ, ისინი დარწმუნებულები უნდა იყვნენ რომ ეს თანამშრომლობა რეპუტაციას არ შეულახავს გამომწერების თვალში. ისინი ყურადღებით და სიფრთხილით არჩევენ ბრენდებს, რომლის პროდუქტების პრომოციაც უნდა გააკეთონ და, რა თქმა უნდა, პროდუქტებიც და ბრენდიც მათი კონტენტის რელევანტური უნდა იყოს. ასეთი ინფლუენსერებისთვის ბრენდის პრომოცია უფასოდაც მისაღებია.

მიკრო ინფლუენსერების გავლენა უფრო და უფრო იზრდება. მათ პოპულარობა იმ თემებით მოიპოვეს, რომლებიც რეალურად აინტერესებთ და იციან, შესაბამისად, მათ მიმართ ნდობაც მაღალია. მათი მიმდევრები კი ინტერნეტში, სოციალური მედიის თვალიერებაში უფრო დიდი დროს ხარჯავენ, ვიდრე ფილმების, ტელევიზორების და სპორტის ყურებაში, რაც იმას ნიშნავს, რომ ამ ადამიანებზე ცნობად სახეებს არ აქვთ ისეთი გავლენა, როგორიც მიკრო ინფლუენსერებს. მიკრო ინფლუენსერები რეალურად მომავლის ინფლუენსერები არიან.

ნანო-ინფლუენსერები

ამ ადამიანებს მცირე რაოდენობის გამომწერები ჰყავთ, მაგრამ ისინი საკმაოდ სპეციფიკური თემების ექსპერტები არიან. ძირითად შემთხვევაში, ათასზე ნაკლები მიმდევარი ჰყავთ, მაგრამ საკმაოდ ხარისხიან აუდიტორიას მოიცავენ.
ბევრი ბრენდისთვის ნანო ინფლუენსერები შეიძლება, შედეგის მომტანი არ იყვნენ, მაგრამ, ბრენდებისთვის, რომლებიც საკმაოდ სპეციფიკურ პროდუქტებს ქმნიან, ისინი ნამდვილად მნიშვნელოვან მარკეტინგულ არხს წარმოადგენენ.

კონტენტის ტიპის მიხედვით:

ინფლუენსერ მარკეტინგი ძირითადად მუშაობს სოციალურ მედიაში, ბლოგებში და ახლა უკვე YouTube-ში.

ბლოგერები

სოციალურ მედიაში ბლოგერებსა და ინფლუენსერებს ყველაზე ავთენტური და გულწრფელი ურთიერთობა აქვთ საკუთარ ფანებთან. ბრენდები ამას ნელ-ნელა ხვდებიან. ბლოგერობა უფრო და უფრო კავშირშია ინფლუენსერობასთან. ინტერნეტი საკმაოდ გავლენიანი ბლოგებით ივსება. თუ პოპულარული ბლოგერი დადებითად ახსენებს თქვენს პროდუქტს თავის კონტენტში ჩათვალეთ, რომ მყიდველების დიდი რიგი დაგიდგებათ.

ბევრმა ბლოგერმა საკმაოდ დიდი აუდიტორიები შემოიკრიბა თავის გარშემო. ისინი წერენ თავიანთი მკითხველებისთვის ჯანმრთელობაზე, თავის მოვლაზე, ფინანსებზე, ბავშვის მოვლაზე და ა.შ.

თუ ბლოგი საკმაოდ გავლენიანია თქვენ შეგიძლიათ, დაასპონსოროთ პოსტები, რაც საშუალებას მოგცემთ, ან თქვენით დაწეროთ კონტენტი ან ბლოგერმა გააკეთოს ეს თქვენი სახელით.

YouTuber-ები

რა თქმა უნდა, ბლოგი ერთადერთი პოპულარული კონტენტი არ არის ინტერნეტში. ვიდეო, შეიძლება ითქვას, ყველაზე პოპულარული და საყვარელი კონტენტია ინტერნეტ მომხმარებლისთვის. ისინი, ვინც ვიდეო კონტენტს აწარმოებენ საკუთარი საიტის შექმნის ნაცვლად youtube არხს ქმნიან. ბრენდები უფრო და უფრო ხშირად თანამშრომლობენ პოპულარულ youtuber-ებთან.  

Podcaster-ები

პოდკასტი შედარებით ახალი ონლაინ კონტენტია, რომლის პოპულარობა უფრო და უფრო იზრდება. მსოფლიოში ნელ-ნელა უკვე ჩნდებიან ინფლუენსერები, რომლებმაც პოდკასტის მიმართულებით სახელი გაითქვეს.

სოციალური ქსელის პოსტები

რა თქმა უნდა, ბლოგერები, პოდკასტერები და youtuber-ები მხოლოდ თავიანთ საიტებს თუ არხებს არ იყენებენ კონტენტის გასავრცელებლად. ისინი აქტიურად პოსტავენ სოციალურ მედიაში, რაც მათ მიკრო-ინფლუენსერებად აქცევს.

ინფლუენსერები გავლენის დონის მიხედვით

ცნობადი სახეები

ცნობადი სახეები ტრადიციული ინფლუენსერები არიან, თუმცა, მათი, როგორც ინფლუენსერების პოპულარობა, იკლებს.

ინფლუენსერ მარკეტინგი ბრენდების ცნობად სახეებთან თანამშრომლობით შეიქმნა. ბიზნესებმა აღმოაჩინეს, რომ მათი გაყიდვები იზრდებოდა მაშინ, როდესაც მათ პროდუქტები ცნობად სახეებთან იკვეთებოდა.

ცნობადი სახეების ინფლუენსერებად გამოყების პირველი პრობლემა ბრენდებისთვის არის ის, რომ მათ შეიძლება არ ჰქონდეთ საკმარისი ინფორმაცია იმ პროდუქტის შესახებ, რის პრომოციასაც აკეთებე,ნ ან საერთოდ არ მოსწონდეთ მათ ეს პროდუქტი, ასეთ დროს ისინი ნაკლებად გულწრფელები არიან აუდიტორიის წინაშე. მეორე პრობლემა გახლავთ ის, რომ ცნობადმა სახემ ისეთ პროდუქტს შეიძლება გაუკეთოს პრომოცია, რომელსაც მასთან არანაირი კავშირი არ აქვს და აუდიტორიისთვის კონკრეტული ცნობადი სახე საერთოდ არ ასოცირდებოდეს მათ მიერ გარეკლამებულ პროდუქტთან.

საზოგადოებრივი აზრის შემქმნელები (Key Opinion Leaders)

ინდუსტრიის ექსპერტები და აზრების ლიდერები, მაგალითად ჟურნალისტები, შეიძლება ჩაითვალონ ინფლუენსერებად.

ისინი პატივისცემასა და ნდობას თავიანთი კვალიფიკაციის, პოზიციის ან გამოცდილების საფუძველზე მოიპოვებენ. ხშირად, კარგ რეპუტაციას მათი სამუშაო ადგილებიც განაპირობებს. მაგალითად, ჟურნალისტი, რომელიც ინდუსტრიის წამყვან კომპანიაში მუშაობს, შესაძლოა არ იყოს კონკრეტული თემის ექსპერტი, მაგრამ პატივისცემა მხოლოდ იმით დაიმსახუროს რომ ის პრესტიჟულ გამომცემლობაში მუშაობს.

ასეთი ექსპერტები შეიძლება იყვნენ:

• ჟურნალისტები
• აკადემიკოსები
• ინდუსტრიის ექსპერტები
• პროფესიონალი მრჩევლები

თუ თქვენი კომპანიის შესახებ ჟურნალისტმა დადებითად ისაუბრა ცნობილ გამომცემლობაში, თქვენ მისი, როგორც ინფლუენსერის გამოყენება შეგიძლიათ, მსგავსად ბლოგერებისა, youtuber-ებისა და ა.შ.

თავად ბლოგერები და კონტენტის შემქმნელებიც იყენებენ ინდუსტრიის ლიდერებს  თავიანთ პოსტებში. ხშირად შეგხვდებათ ასეთი ადამიანების გამონათქვამები მათ კონტენტში. ტრადიციულ მედიასა და სოციალურ მედიას შორის ხაზი უფრო და უფრო შეუმჩნეველი ხდება. 

მნიშვნელოვანი ფაქტორი, რაც ასეთ ადამიანებთან თანამშრომლობისას უნდა გაითვალისწინოთ არის ის, რომ ისინი ტრადიციული მეთოდებით მუშაობენ და არ ჰყავთ აქტიური მიმდევრები სოციალურ ქსელში.

ადამიანები, რომლებსაც საშუალოზე მაღალი გავლენა აქვთ თავიანთ აუდიტორიებზე

საუკეთესო ინფლუენსერებად ითვლებიან ადამიანები, რომლებიც ინდუსტრიის ექსპერტები არიან და კარგი რეპუტაცია ონლაინ აქტიურობით მოიპოვეს. ისინი ხარისხიან კონტენტს ქმნიან ბლოგებით, პოდკასტებით, ვიდეოებით, პოსტებით და ა.შ.

ასეთი ადამიანების დასახასიათებლად არ არსებობს კონკრეტული ტერმინი. ბრიტანეთის სააგენტომ, PMYB, მათ Chromo-Influencer-ები უწოდა. ამავე სააგენტომ შეადგინა 46 მნიშვნელოვანი ელემენტის სია, რომლის მიხედვითაც ამ ადამიანების გავლენა იზომება. ასეთ ინფლუენსერებს აქვთ საუკეთესო კომუნიკაციის უნარები, რითაც ისინი გავლენას ახდენენ თავიანთ გამომწერებზე.   

მათი მიმდევრების რაოდენობა დამოკიდებულია თემებზე, რომლებზეც ისინი მუშაობენ.

ასევე დაგაინტერესებთ:

რა არის ინფლუენსერ მარკეტინგი?

ინფლუენსერ მარკეტინგის წარმატებული კამპანიის მაგალითები

როგორ შევიმუშავოთ ინფლუენსერ სტრატეგია