როგორ მოვიქცეთ, როდესაც კონურენტი ჩვენი ბრენდის ქივორდებს ყიდულობს
იყენებთ საძიებო სისტემების ფასიან რეკლამებს ბრენდის პრომოციისთვის?
ალბათ, ხარისხიანი ლიდების მოსაზიდად საკმაო თანხაც გაქვთ გამოყოფილი (ბრენდის მასშტაბებზე დაყრდნობით). შესაძლოა იცით, რომ ამ პროცესში ბრენდის ქივორდებისა და სახელის გამოყენება ერთ-ერთი ყველაზე ეფექტური მეთოდია, თანაც ნაცადი.
ახლა წარმოიდგინეთ, რომ ერთ დილასაც ხსნით ლეპტოპს და ხედავთ, რომ თქვენი ბრენდირებული ქივორდების სია და რეკლამები სრულად თქვენს კონკურენტს აქვს შეძენილი.
სამწუხაროდ, ეს ტაქტიკა სრულიად გამართლებულია და მას არც Google და არც Bing არ კრძალავს. ერთადერთი შეზღუდვა, რაც კონკურენტებზე შეიძლება გავრცელდეს, არის ის, რომ მათ არ შეუძლიათ თქვენი სავაჭრო მარკით დაცული ბრენდის სახელის გამოყენება საკუთარ რეკლამაში.
მაგალითად, Honda-ს შეეძლო მისი რეკლამებისთვის შეეძინა ქივორდები „Toyota”-ს გარშემო. რაც იმას ნიშნავს, რომ როდესაც მომხმარებელი ტოიტას მოძებნიდა საძიებო სისტემაში, მას ჰონდას რეკლამა გამოუჩნდებოდა. ამის გამო არაერთმა კომპანიამ უჩივლა Google-ს, თუმცა სრულიად უშედეგოდ, რადგან მათი ახსნით ეს სამართლებრივ ნორმებში ექცეოდა.
საბედნიეროდ, ამ პრობლემის აღმოსაფხვრელად სხვადასხვა გზები არსებობს - ცხადია, არ გსურთ პოტენციური მომხმარებლის დაკარგვა მხოლოდ იმიტომ, რომ მან პირველი თქვენი კონკურენტის რეკლამა ნახა.
-
ფლობდეთ საკუთარ ბრენდირებულ სახელს Google-ში
ყოველთვის ლოგიკურად არ ჟღერს საკუთარ ბრენდირებულ ქივორდებზე ფსონების განთავსება, თუმცა ეს საკმაოდ ეფექტური საშუალებაა ბრენდის სახელის დასაცავად და იმ კლიკების დასაბრუნებლად, რომლებიც კონკურენტებმა დაგაკარგინათ. ზოგიერთ შემთხვევაში, კონკურენტები თქვენი ბრენდირებული ქივორდების ყიდვას ახერხებენ და ამით გახსენებენ, რომ თქვენ ამის გაკეთება დაგავიწყდათ.
თქვენმა კონკურენტმა დაინახა, რომ თქვენს ქივორდებს არავინ ყიდულობდა (თქვენი ჩათვლით), ამიტომაც მან ეს საკუთარ უპირატესობად აქცია და თქვენი პოტენციური, ღირებული ლიდები საკუთარი ბიზნესისკენ მიიზადა.
ბრენდირებული სახელის შესყიდვის კიდევ ერთი უპირატესობა არის ის, რომ მესიჯები სრულად თქვენს ხელშია. ეს საშუალებას გაძლევთ, შექმნათ სხვადასხვა ტიპის რეკლამები და დააკვირდეთ, რომელი უფრო ეფექტურია.
- უნდა დაურთოთ რეკლამას CTA - მოწოდება ქმედებისკენ?
- გჭირდებათ ფასდაკლების ვაუჩერის ან კოდის დამატება?
- საჭიროა, აცნობოთ ადამიანებს, რომ თქვენი შეთავაზება ორ დღიან უფასო მიწოდებას მოიცავს?
როდესაც სხვა ბიზნესი ყიდულობს თქვენს ბრენდს/სახელს, მას არანაირი ინტერესი არ გააჩნია თქვენი ბიზნესის შესახებ რეკლამების გამოქვეყნებისთვის. რამდენად მსგავსიც არ უნდა იყოს თქვენი ბიზნესები, გაყიდვის უნიკალური მესიჯი მაინც განსხვავებული იქნება.
მხოლოდ იმის გამო, რომ თქვენს ბრენდირებულ ქივორდს სხვა იყენებს, არაა საჭირო თქვენც ძველი სარეკლამო ტექსტი დაიტოვოთ. მიმართეთ კრეატიულობას. ამის შესანიშნავი მაგალითი Bidnamic-ია.
სხვაგვარად რომ ვთქვათ, მესიჯის კონტროლი ისე უნდა მოახდინოთ, რომ ეს საძიებო შედეგებში თქვენს პოზიციას ესადაგებოდეს, მაშინაც კი თუ კონკურენტის რეკლამაც ჩანს. სტანდარტული ბიდინგის გარდა კიდევ არსებობს რამდენიმე, ნაკლებად ცნობილი გზა ქივორდებზე ფსონების განსათავსებლად:
სამიზნე ჩვენებების წილი
Target Impression share არის ბიდინგის ავტომატური სტრატეგია, რომელიც დინამიურად აწესებს ფსონებს და ამგვარად ზრდის რეკლამის გამოჩენის შანსებსა და მის ეფექტურობას. რეკლამა შესაძლოა გამოჩნდეს:
- საძიებო შედეგების ნებისმიერ ადგილას
- საძიებო შედეგების ტოპ 3 პოზიციაზე
- საძიებო შედეგების სათავეში
Google Ads ავტომატურად დააწესებს თქვენს ფსონებს შესაბამისი მიზნის მისაღწევად.
გადადით პარამეტრებში > ბიდინგი > ბიდინგის სტრატეგიის ცვლილება > Target Impression share. მთავარი პარამეტრები, რომელთა განახლებაც მოგიწევთ, არის:
სად გსურთ გამოჩნდეს თქვენი რეკლამა: თქვენი ბიუჯეტი და იმ ლიდების რაოდენობა, რასაც კონკურენტის გამო კარგავთ, გადაწყვეტს იმას, თუ რომელი განთავსების ადგილი იქნება თქვენთვის ხელსაყრელი. უმჯობესია, თუ რამდენიმე ვარიანტს მოსინჯავთ და მათ შედეგიანობას შეაფასებთ.
სასურველი ჩვენებების პროცენტული წილი: ბრენდისათვის 100% საწყისი პარამეტრი უნდა იყოს, თუმცა შეიყვანეთ აუქციონების ის პროცენტული წილი, რომელში გამარჯვება და კონკურენტის დაჯაბნაც გსურთ.
ფსონის მაქსიმალური ლიმიტი: ეს არის თითო კლიკზე ხარჯის მაქსიმალური ოდენობა, რომლის გადახდისთვისაც ხართ მზად. გახსოვდეთ, თუ სტრატეგიის ფარგლებში ბიუჯეტი შეზღუდულია, შესაძლოა, მან საკუთარი პოტენციალი სრულად ვერ გამოიყენოს და არ იყოს ისეთივე ეფექტური, როგორიც შეზღუდვების გარეშე იქნებოდა.
სტრატეგიის ეფექტურად ამუშავებას სულ მცირე შვიდი დღე მაინც სჭირდება შედეგების მისაღებად, ამიტომ გირჩევთ, სანამ რაიმე ცვლილებას შეიტანდეთ, დაიცადოთ და დაელოდოთ მაჩვენებლებს.
-
დაელაპარაკეთ ბიზნესებს, შეაჩერეთ ისინი
სანამ რაიმეს მოიმოქმედებდეთ, მნიშვნელოვანია კონკურენტებთან დაკავშირება და მათ მიერ რეკლამების თქვენს ქივორდზე გაუქმება. შესაძლოა ფიქრობდეთ, რომ ამის გაკეთება უსაფუძვლოა და ამგვარად კონკურენტს ვერ დაიყოლიებთ. შესაძლოა, მართალიც იყოთ, თუმცა ყოველთვის სჯობს ბიზნესთან დალაპარაკება და მათთვის ყველაფრის გამოსწორების შესაძლებლობის მიცემა.
ზოგიერთ შემთხვევაში შესაძლოა, კონკურენტმა სულაც არ იცოდეს, რომ თქვენი ბრენდის ქივორდები აქვს შეძენილი, განსაკუთრებით მაშინ, თუ ისინი სარეკლამო სააგენტოსთან თანამშრომლობენ და საკუთარ სტრატეგიას არ ამჟღავნებენ.
-
შეიტანეთ საჩივარი სავაჭრო მარკასთან დაკავშირებით
ამის შესაძლებლობა მხოლოდ იმ შემთხვევაში გექნებათ, თუ ბრენდის სახელზე სავაჭრო ნიშანს ფლობთ. განაცხადის შეტანის საფუძველზე შეგეძლებათ, ყველა ედვერთაიზერს აუკრძალოთ თქვენი ბრენდის ქივორდის გამოყენება. შესაძლოა, ამან შემთხვევების 100% არ აგარიდოთ თავიდან, თუმცა მათ სიხშირეს მნიშვნელოვნად შეამცირებს.
ასეთი განაცხადების შევსება Google-ზე შესაძლებელია აქ, ხოლო Bing-ზე კი აქ.
განაცხადის გაკეთებისას აუცილებლად მიუთითეთ სავაჭრო ნიშნის მფლობელის ელექტრონული ფოსტა. ამგვარად, დამატებით გამოხმაურებას და გადამოწმებებსაც აირიდებთ თავიდან და პროცესი უფრო სწრაფი იქნება.
მოიკრიბეთ ყველა საჭირო დოკუმენტი წინასწარ - პროცესის დაწყებამდე მოამზადეთ საჭირო დოკუმენტაცია. კომპანიის მოცულობის მიხედვით, დოკუმენტაციის ტიპები შესაძლოა, განსხვავებული იყოს. ეს მოიცავს:
- სავაჭრო ნიშნის მქონე ტერმინების სრულ ჩამონათვალს
- სავაჭრო ნიშნის რეგისტრაციის ნომერსა და ქვეყანას.
- სავაჭრო ნიშნის მფლობელის ვინაობას.
- სარეკლამო ანგარიშის ID-სა და სახელს.
- სასარჩელო რეკლამების სურათებს (screenshot).
- ყველა იმ საიტის ჩამონათვალს, რომლებსაც შეუძლიათ სავაჭრო ნიშნის გამოყენება
- თქვენი (ან თქვენი სააგენტოს) Bing/Google ექაუნთ მენეჯერს.
-
ეცადეთ, შეიძინოთ კონკურენტი ბრენდის ქივორდები
თუ ზემოთ ჩამოთვლილი მეთოდები არ გაამართლებს, ყოველთვის შეგიძლიათ, კონკურენტის ბრენდირებული ქივორდები თქვენც შეიძინოთ. თქვენი CPC (ხარჯი თითო კლიკზე) გაცილებით მაღალია, როდესაც სხვა ბრენდის ქივორდს ირჩევთ, თუმცა გარკვეული სარგებელი ამას შეიძლება, მაინც ჰქონდეს.
სანამ რომელიმე ქივორდზე ფსონს განათავსებდეთ, შეისწავლეთ კონკურენტების მიერ გენერირებული ტრაფიკი ამ ქივორდიდან. SemRush და Spyfu ამისათვის შესანიშნავი ხელსაწყოებია, თანაც მათი გამოყენება საკმაოდ მარტივია.
თქვენი კონკურენტის ქივორდებზე ფსონების განთავსებით შესაძლოა, მათი CPC აამაღლოთ, წამოიყვანოთ მათი ლიდების გარკვეული წილი და პოტენციურად უბიძგოთ მათ თქვენი ბრენდის სახელის გამოყენების შეწყვეტისაკენ. გახსოვდეთ, რომ კონკურენტის სავაჭრო ნიშნის გამოყენებას ვერ შეძლებთ რეკლამის ტექსტში, ამიტომ კრეატიულად მიუდექით რეკლამის შექმნის პროცესს.
გაითვალისწინეთ, რომ ამ პროცესში თქვენი რეიტინგები საკმაოდ დაბალი იქნება, რაც რელევანტურობით არის განპირობებული. Google-ის ალგორითმმა შესაძლოა CPC-იც გაგიზარდოთ საშუალო მაჩვენებელთან შედარებით. ერთ-ერთი სტრატეგია ამის მცირედით თავიდან აცილებისთვის შეიძლება, თქვენს საიტზე შედარებითი გრაფის, დიაგრამის გამოჩენა იყოს.
ამის იდეალური მაგალითია Monday.com, რომელიც კონკურენტის ქივორდს გონივრულად იყენებს.
ეს დიაგრამა ლენდინგ გვერდშიც ეფექტურად ჯდება და კონკურენტის ქივორდის გამოყენებასაც ბუნებრივად ამართლებს.
როგორც ხედავთ, მსგავსი დიაგრამები იდეალურია ბრენდების შედარებისთვის. თუმცა არ უნდა დაგავიწყდეთ, რომ ლენდინგ გვერდზე შესაბამისი, ძლიერი CTA-ც დაიტანოთ, რათა მომხმარებელთა კონვერსიას შეუწყოთ ხელი.
ახლა კი დაიცავით თქვენი ბრენდი
მას შემდეგ, რაც კონკურენტი თქვენს ბრენდირებულ ქივორდებს გამოიყენებს, საჭიროა, მომენტალურად მიმართოთ შესაბამის ზომებს, რათა მათ თქვენი პოტენციური და ხარისხიანი ლიდების ათვისება ვერ შეძლონ.
პირველ რიგში, დაეკონტაქტეთ მათ და გაარკვიეთ, შეგიძლიათ თუ არა პრობლემის მოგვარება ზედმეტი გართულებების გარეშე. თუ ეს არ ხერხდება, მაშინ მიმართეთ ზემოთ ჩამოთვლილ მეთოდებს.
ასევე დაგაინტერესებთ:
