ელექტრონული კომერციის 8 ტრენდი სილამაზის ინდუსტრიისთვის

ივნისი 28, 2021

ელექტრონული კომერციის 8 ტრენდი სილამაზის ინდუსტრიისთვის

სილამაზის ინდუსტრია ყოველთვის წინა პლანზე იდგა, როდესაც საქმე ელექტრონული კომერციის ინოვაციასა და რენოვაციას ეხებოდა

სილამაზის ინდუსტრია ყოველთვის წინა პლანზე იდგა, როდესაც საქმე ელექტრონული კომერციის ინოვაციასა და რენოვაციას ეხებოდა და არც 2021 წელია გამონაკლისი. ორგანული პროდუქტებითა და ჰიპერ პერსონალიზებული კანის მოვლის საშუალებებით დაწყებული, AI (ხელოვნური ინტელექტი) კოსმეტიკური მიდგომებით დამთავრებული, ინდუსტრიის მონაწილე ბრენდები ყოველთვის ცდილობდნენ საკუთარი მომხმარებლის გამოცდილების დახვეწას.

სწორედ ამიტომ, გადავწყვიტეთ თქვენთვის წარმოგვედგინა ელექტრონული კომერციის ის ტრენდები, რომლებსაც ყველაზე ხშირად შევხვდებით 2021 წელს სილამაზისა და თავის მოვლის ინდუსტრიაში.

  1. ინკლუზიურობა ფასდაუდებელია

Nielsen-ის მიერ ამერიკაში ჩატარებული კვლევებით გამოჩნდა, რომ სილამაზის ინდუსტრიაში არსებულმა ბრენდებმა საბოლოოდ შეძლეს მრავალფეროვნებისა და დივერსიფიცირების მიღწევა. უნიკალურ ფერთა დიაპაზონი შვიდჯერ უფრო სწრაფად განვითარდა, ისევე როგორც თავად პროდუქციის ხაზი.

ამგვარი მრავალფეროვნება თითოეულ ადამიანს ეხმარება, იპოვოს საკუთარი თავი.

დღესდღეობით, უფრო და უფრო მეტ მომხმარებელს სურს, მოძებნoს საკუთარი თავისთვის, საკუთარ მახასიათებლებსა და ცხოვრების სტილზე მორგებული პროდუქცია. სწორედ ამიტომ, ისეთი კომპანიები, რომლებიც მიმართავენ ინკლუზიურ სტილს და ამრავალფეროვნებენ საკუთარი პროდუქციის ასორტიმენტს, გაცილებით უფრო მაღალ შედეგებს აღწევენ და უფრო მაღალი შემოსავლებითაც გამოირჩევიან - მათი ძალისხმევა ფასდება!

სხვადასხვა ფერთა შემოთავაზება პოზიტიური სტარტი რომ არის, ამას უამრავი მომხმარებელი აღნიშნავს და განსაკუთრებით ფერადკანიანი ქალბატონების უმრავლესობა. თუმცა, ჩრდილების დიაპაზონის გაფართოებასთან ერთად გარკვეული პრობლემებიც ჩნდება - ხარისხი და ოდენობა.

„როგორც ფერადკანიანი ადამიანი, შეიძლება ხედავდე, რომ ბრენდს 50-მდე ჩრდილი აქვს, თუმცა მაინც ვერც ერთი ტონის გამოყენება ვერ შეძლო“ - ამბობს Kimberly Smith, Brown Beauty Co-op-ის თანადამფუძნებელი. „ეს მხოლოდ ჩრდილებსა და ფერთა კოპლექსურობას არ ეხება, ეს გაცილებით მეტია და ვფიქრობ, ბრენდები ნაკლებად ცდილობენ დაუთმონ დრო და გაიაზრონ, თუ რა გვჭირდება ჩვენს ფერად კოსმეტიკაში.“

  1. VR, AR და ტექნოლოგიური პარტნიორობა

2019 წლის ოქტომბერში, მსოფლიოს წამყვანმა AR კომპანიამ - Perfect Corp დაიწყო თანამშრომლობა ჩინური ელექტრონული კომერციის გიგანტთან და შექმნა YouCam Makeup AR - რომელიც მაკიაჟის ვირტუალურ ტექნოლოგიას წარმოადგენდა. მისი მიზანი ონლაინ შოპინგის გამოცდილების გაუმჯობესება იყო, რამაც სრულიად ახალი შესაძლებლობები გახნსა ჩინეთის ბაზარზე. მხოლოდ ექვს თვიანი თანამშრომლობის შემდეგ, Alibaba-მ განაცხადა, რომ მათი კონვერსიის მაჩვენებელი ოთხჯერ გაიზარდა ამ ხნის განმავლობაში.

ამის შემდეგ კი სრულიად სილამაზის ინდუსტრიაში ახალმა ტექნოლოგიებმა მოიკიდეს ფეხი. ისეთმა ტექნოლოგიებმა, როგორიც არის AI, AR და VR (ვირტუალური რეალობა).

ეს ეფექტი განსაკუთრებით შესამჩნევია L’Oreal India-ისთვის, რომლის მართველმა დირექტორმაც გადაწყვიტა, რომ ბაზარზე არსებული ცვლილებებიდან გამომდინარე, სილამაზის ბრენდი, სილამაზის ტექნოლოგიურ კომპანიად გადაექცია.

და ის ერთადერთდი არ არის. მას არაერთი კომპანია უერთდება ამ წამოწყებაში. მალაიზიაში არსებული კანის მოვლის საშუალებების მწარმოებელმა კომპანიამ Nutox-მა დაიწყო თანამშრომლობა Ministry XR-თან, რომელთან ერთადაც ის „კანის ანალიტიკურ ხელსაწყოს“ ქმნის. ეს ხელსაწყო შექმნილია ხელოვნურ ინტელექტსა და კომპიუტერულ ხედვაზე დაფუძნებით, რაც მომხმარებლისთვის მაქსიმალურად პერსონალიზებული და მასზე მორგებული გამოცდილების შეთავაზებას ემსახურება (ონლაინ შოპინგის დროს) - რადგან საკმაოდ რთულია იყიდო ისეთი რაღაც, რისი ნიმუშის მოსინჯვაც ფიზიკურად არ შეგიძლია.

ხელსაწყოს გამოყენება ნებისმიერ ადამიანს შეუძლია, რომელიც სმარტფონის მფლობელია - პროგრამა აანალიზებს მათ კანს და წარმოადგენს თითოეულ დეტალს, თითოეულ პრობლემას - ტექსტურას, ნაოჭებს, პიგმენტაციას და ა.შ. 

Nutox-მა მისი ტექნოლოგიური განვთარების ხარჯზე მოახერხა მომხმარებლის ჩართულობის ამაღლებაც და მათთვის დამატებითი ღირებულების შეთავაზებაც. ამასთან ერთად გაზარდა მისი კონვერსიის მაჩვენებელიც და გაყიდვებიც, რადგან კომპანია ახლა იმაზე გაცილებით მეტია, ვიდრე უბრალოდ კანის მოვლის საშუალებების მწარმოებელი ბრენდი.

ამგვარი მიდგომები სრულიად ცვლის მომხმარებლის დამოკიდებულებას და გამოცდილებას სილამაზისა და კოსმეტიკური ბრენდების მიმართ და ინდუსტრიაში სრულიად ახალ სიტყვას ამბობს.

ფეისბუქის AR სტუდიამაც გადადგა ნაბიჯები ამ კუთხით განვითარებისთვის და მომხმარებლისთვის ინტერაქტიული გამოცდილების შესაქმნელად. ისეთი პოპულარული პლატფორმები, როგორებიც არიან ფეისბუქი, ინსტაგრამი და იუთუბი, უკვე გვთავაზობენ AR ტექნოლოგიებს საბანერო რეკლამებში, სადაც მომხმარებელს შეუძლია, დააკლიკოს სურათზე და ვირტუალურად მოისინჯოს კოსმეტიკური პროდუქტები. Chanel, YSL, Charlotte Tilbury და სხვა ბრენდებიც უკვე გვთავაზობენ VR მომსახურებას მათ საიტსა და მობილურ აპლიკაციაზე.

  1. გამოწერის სერვისები

როგორც ნავარაუდებია, სილამაზის ინდუსტრიაში პროდუქციის ყუთების გამოწერების ღირებულება 2022 წლისათვის 72%-ით გაიზრდება და ამ სტატისტიკას  მსოფლიოს მასშტაბითაც ეთანხმებიან.

First Insight-ის უკანასკნელი კვლევების თანახმად, ამერიკის მასშტაბით “Subscription boxes” მომხმარებელთა 25%-ს აქვს გამოწერილი, ხოლო 32% გეგმავს მის გამოწერას მომდევნო ექვსი თვის განმავლობაში.

სილამაზის ინდუსტრიის ელექტრონული კომერციის სფეროში ისეთმა კომპანიებმა, როგორებიც არიან Birchbox და Glossybox, გვაჩვენეს თუ რამდენად წარმატებული შეიძლება იყოს ყუთების გამოწერის (Subscription boxes) ბიზნეს მოდელი. McKinsey-ის კვლევის ფარგლებში, რომელმაც 5,000 ამერიკელი მომხმარებელი გამოკითხა, დადგინდა, რომ მომხმარებელთა 55% ამჯობინებს ისეთ სერვისს, რომელიც მოულოდნელობის, სიურპრიზის ფაქტორს იყენებს და ცდილობს, მაქსიმალურად იყოს მორგებული მომხმარებელზე. რაც პერსონალიზებული მომსახურების გავრცელებას კიდევ უფრო უწყობს ხელს. 

გამოწერის სერვისი ქალბატონებისთვის და თმის მოვლის საშუალებები მამაკაცებისთვის მიჩნეულ იქნა, როგორც ერთ-ერთი ყველაზე მზარდი მიმართულება ბაზარზე. ამიტომ სულაც არ არის გასაკვირი, რომ ამან ისეთი ბრენდებისა და გადამყიდველების ყურადღება მიიქცია, როგორიც არის P&G, Sephora და Walmart (სილამაზის ყუთი).

სილამაზის ყუთები მომხმარებელთა მარაგის შევსებასა და განახლებას ემსახურება, თუმცა ამავდროულად მათ საშუალებას აძლევს, დამატებით ახალი პროდუქტი გამოსცადონ. მომხმარებლებს ყოველთვის სურთ სიახლე და ინოვაციური პროდუქტი გრძელვადიანი თანამშრომლობისთვის.

FabFitFun არის ერთ-ერთი მაგალითი ასეთი ყუთების გამოწერის სერვისისათვის. ბრენდი წლების განმავლობაში 300% -ით იზრდებოდა და 2018 წლისთვის, ამ სერვისის წყალობით მათ $200 მილიონი წლიური შემოსავლის გენერირება შეძლეს.

დამატებითი ღირებულების შეთავაზების გზით კომპანია ცდილობს, მაქსიმალურად შეინარჩუნოს საკუთარი მომხმარებელი. ამისათვის ის დამატებით კონტენტს ქმნის, სადაც მომხმარებელს ასწავლის, თუ როგორ შეიძლება მათი პროდუქციის გამოყენება.

გარდა ამისა, მომხმარებელთა ჩართულობის ასამაღლებლად, პროდუქტის მიწოდებამდე კომპანიას სპეციალური ჩათი აქვს შექმნილი საკუთარ ვებ-გვერდზე, სადაც წევრებს შეუძლიათ განიხილონ სხვადასხვა რეცეპტები, წონის კლების საშუალებები და დეკორაციული ხრიკები. მათ ასევე შექმნეს სპეციალურად წევრებისთვის განკუთვნილი ტელეარხი, ასევე  Facebook Live-ის საშუალებით კომპანია ამცნობს მომხმარებელს, თუ სად შეუძლიათ მათ შეიტყონ უფრო მეტი პროდუქტების შესახებ და მიიღონ მათთვის სასურველი კონტენტი.

შეიძლება ითქვას, რომ FabFitFun პერსონალიზაციის ხელოვნების განვითარებას ემსახურება და ცდილობს მომხმარებლისთვის მუდმივად ახალი გამოცდილება შექმნას.

„თუ მომხმარებელი მიიჩნევს, რომ ბრენდი გაცილებით მეტია, ვიდრე ყუთი და ის სოციუმთან დამაკავშირებელი რგოლია, რომელიც მას ღირებულ ინფორმაციას აწვდის, მაშინ ძნელი იქნება განვსაზღვროთ ასეთი გამოცდილების ფასი.“ – FabFitFun თანადამფუძნებელი.

  1. ბუნებრივი, ორგანული და გამჭვირვალე სილამაზე

დღეს მომხმარებლები ისეთ ბრენდებს ეძებენ, რომლებიც მაქსიმალურად გამჭვირვალეები არიან საკუთარ გამოყენებულ ინგრედიენტებთან მიმართებაში. 2018 წლის შემდეგ, სილამაზის ინდუსტრიაში ორგანული პროდუქცია საოცრად პოპულარული და მოთხოვნადი გახდა.

ბრენდებისთვის ისეთი პროდუქტების გაყიდვებმა, რომლებიც მათი თქმით ბუნებრივი და ორგანულია, 1.2%-ით დაიკლო გასული წლის განმავლობაში, მაგრამ ამავდროულად, პარაბენებისგან თავისუფალი პროდუქტების გაყიდვები 2.3%-ით გაიზარდა. გარდა ამისა, იმ პროდუქტების გაყიდვები, რომლებიც პარაბენებს არ შეიცავს და თანაც ორგანულად მიიჩნევა, 12%-ით გაიზარდა.

ამის ნათელი მაგალითია ამერიკული კოსმეტიკის ბრენდი Kiehl’s , რომელმაც შეძლო მისი სახის კანის კრემის ხელახალი ფორმულირება იმგვარად, რომ ის პარაბენებისგან გაეთავისუფლებინა. შედეგად კომპანიის გაყიდვები $5 მილიონით გაიზარდა, რაც მათ დაეხმარა, მოხვედრილიყვნენ ამერიკის საუკეთესო ხუთეულში კანის მოვლის საშუალებების სხვა ბრენდებთან ერთად.

სურვილი იმისა, რომ მომხმარებელმა ნატურალური და ორგანული პროდუქტი გამოსცადოს, ქმნის ახალ ნიშებს - ისეთს, როგორიც არის ლურჯი ოკეანე - კონცეფცია, რომელიც ისეთ პროდუქციას მოიცავს, რომელიც მსოფლიოს ოკეანეებისა და წყლის მარაგების გადარჩენას ემსახურება. 

იმის წარმოსაჩენად, რომ პროდუქცია მხოლოდ ნატურალურ და ორგანულ ინგრედიენტებს შეიცავს, არაერთი კომპანია მისი პროდუქტის პრეზენტაციისას იმ ინგრედიენტებს წარადგენს, რომელიც მათი პროდუქტის შემცველობაში არ შედის.

  1. მსხვილი მონაცემთა ბაზის გამოყენება ახალი პროდუქტის განვითარებისთვის

სილამაზის ინდუსტრიისთვის შემდეგი დიადი მიღწევა სოციუმის შექმნაა. ბრენდები, რომლებიც მომავალში ყველაზე წარმატებულები იქნებიან, არიან ის ბრენდები, რომლებიც მოახერხებენ საკუთარი მომხმარებლების გააქტიურებას, მათ ბრენდთან დაკავშირებას, ერთობლივ განვითარებას და დაიხმარენ მათ ბიზნესის თითოეულ ასპექტში.

ეს ყველაფერი კი მონაცემებისა და ინფორმაციის გარეშე წარმოუდგენელია. მათი შეგროვება გამოკითხვების, საძიებო სისტემების შესწავლისა და მსყიდვლობითი ქცევების გააზრების შედეგადაა შესაძლებელი.

ერთ-ერთმა კომპანიამ - Oley შეძლო და 2016 წლიდან მისი ბიზნესის ვარდნის ტრაექტორია სრულიად საპირისპირო მიმართულებით შეცვალა. ეს მას შემდეგ მოხდა, რაც კომპანიამ ციფრული სტრატეგიების ინტეგრირება დაიწყო საკუთარ სამუშაო პროცესებში და ეცადა დაწვრილებით გაეგო, თუ რა სჭირდებოდათ და სურდათ მათ მომხმარებლებს.

Procter & Gamble-თან ერთად, ბრენდმა შექმნა Olay Skin Advisor - ვებ პროგრამა, რომელიც მონაცემების შეგროვების საშუალებით ადამიანებს ეხმარებოდა, გაეგოთ, როგორი პროდუქცია იყო უკეთესი მათი კანისთვის.

არც თუ ისე ხანგრძლივი პერიოდის განმავლობაში კომპანიამ ექვსი მილიონი მონაცემის შეგროვება შეძლო, რამაც მათი პროდუქტის განვითარებაში უდიდესი წვლილი შეიტანა.

მაგალითად, კომპანიამ გააცნობიერა, რომ მომხმარებელთა საკმაოდ დიდ პროცენტს სურდა არომატებისგან თავისუფალი პროდუქციის მოხმარება. ამიტომ ბრენდმა მალევე დაიწყო მათი თავდაპირველი პროდუქტის - დამატენიანებლების უსუნო ალტერნატივის გამოშვება, რაც ისეთივე წარმატებული აღმოჩნდა, როგორც საწყისი პროდუქტი. ბრენდმა სტრატეგია სამომავლო პროდუქტებისთვისაც შეინარჩუნა, რამაც ისინი Olay Retinol 24 შექმნამდე მიიყვანა, რადგან მათი კვლევების თანახმად, რეტინოლი ყველაზე ხშირად მოძებნადი ინგრედიენტი იყო საძიებო სისტემებში.

დღესდღეობით, უკვე ძალიან ბევრი კომპანია აგროვებს მონაცემებს, რომლებსაც პროდუქციის განვითარებისთვის იყენებს.

Proven - სილამაზის ინდუსტრიაში მყოფი სტარტაპი უამრავ მონაცემს იყენებს და აანალიზებს მას, რათა ხელოვნური ინტელექტის დახმარებით შექმნას ათასობით პროდუქტის განხილვა, შეაფასოს 20,000-ზე მეტი ინგრედიენტი და მიმოიხილოს სპეციფიკური მეცინიერული სტატიები. მასიური მონაცემთა ბაზის წყალობით, კომპანია თითოეული მომხმარებლისთვის ახერხებს შექმნას მასზე მორგებული პროგრამა.

ამავდროულად, კომპანია Prose-ს დაქირავებული ჰყავს ინჟინერთა ჯგუფი პარიზში, რომლებიც ცდილობენ მომხმარებლებს შორის მსგავსებების იდენტიფიცირებას და იმის გაგებას, თუ რომელი ინგრედიენტების შერევა შეიძლება ერთმანეთთან, რათა მომხმარებლის კმაყოფილება გაიზარდოს. ისინი აცხადებენ, რომ გასული წლის განმავლობაში ამ ტაქტიკის წყალობით მათ კმაყოფილების ქულის გაზდა 30 ერთეულით, დაახლოებით 90%-ით მოახერხეს.

  1. ინვესტიცია ინფლუენსერებში

ინფლუენსერ მარკეტინგი საკამოდ დიდ როლს თამაშობს სილამაზის ინდუსტრიაში და ეს ტენდენცია სამომავლოდაც ასე გაგრძელდება. 2017 წლის კვლევების შემდეგ დადგინდა, რომ ინფლუენსერ მარკეტინგის წყალობით, ბრენდების მიერ დახარჯულ თითოეულ $1 დოლარზე, ისინი $11,45 დოლარიან უკუგებას იღებდნენ.

ამგვარი უკუგების მიღება კი დღეს გაცილებით მარტივია, ვინაიდან მსხვილ ინფლუენსერებთან ერთად ბაზარზე გამოჩნდა შესაძლებლობა მიკრო და მცირე ინფუენსერებთან თანამშრომლობისაც.

ჰარვარდის ბიზნეს სკოლის კვლევის თანახმად, ინფლუენსერ მარკეტინგზე გლობალურად დახარჯულმა თანხებმა 2017 წელს $2 მილიარდს, 2019 წელს კი $8 მილიარდს მიაღწია და ნავარაუდებია, რომ ეს თანხები 2022 წლისთვის $15 მილიარდამდე გაიზრდება.

მაგალითად, ინდუსტრიის ერთ-ერთი გიგანტი - Estée Lauder ინფლუენსერ მარკეტინგზე მისი მარკეტინგული ბიუჯეტის 75%-ს ხარჯავს.

ასევე აღსანიშნავია L’Oreal-ის წამოწყება „სილამაზის ნაკრები“, სადაც ინფლუენსერთა ჯგუფი ქმნის ვიდეოებსა და სტატიებს YouTube-ის, კომპანიის ვებ-გვერდისთვის და სოციალური არხებისთვის, რაც მათი საერთო რიჩის მოცულობას 5.5 მილიონამდე ზრდის.

Ipsy ასევე იყენებს ინფლუენსერებსა და ბრენდის ამბასადორებს ვიდეოების შესაქმნელად, სადაც ისინი კომპანიის ნაკრებს ხსნიან და აჩვენებენ ხალხს, თუ როგორ შეიძლება ყუთში არსებული პროდუქტების გამოყენება, რაც საკმაოდ ეფექტური ხერხია იმის გათვალისწინებით, რომ ხალხს უყვარს ასეთი ვიდეოების ყურება.

კომპანიის ინფლუენსერები იუთუბის საშუალებით მილიონობით დოლარის სარეკლამო შემოსავლებს გამოიმუშავებენ, რომელსაც შემდგომ ისევ კომპანიას უზიარებენ. თავის მხრივ, კომპანია ამ ინფლუენსერებს მათი ბიზნესის ნაწილად აქცევს, დამატებით ინფლუენსერებს სთავაზობს დახმარებას და აძლევს შანსს დამწყებებს, გახდნენ Ipsy-ის აუდიტორიის წევრები. კომპანია ასევე სთავაზობს მათ სტუდიას, სადაც ისინი მაღალხარისხიანი ვიდეოების გადაღებას ახერხებენ.

ყველაფრის მიუხედავად, ცვლილებები ყველა სფეროში გარდაუვალია და ამჟამად ინფლუენსერების ინდუსტრიაშიც შესაძლოა ახალ ტრენდს, სახელად: ბუნებრიობას ვხედავდეთ.

სწორედ ამიტომ, ბრენდები და ინფლუენსერები, რომლებიც საკუთარ თავს ბუნებრივად წარმოაჩენენ აუდიტორიის წინაშე, ნამდვილად გამორჩეულები იქნებიან. ამასთანავე, უფრო გულწრფელი და ღია მიდგომა მომხმარებლის ნდობასაც აამაღლებს.

  1. ბრენდირებული პარტნიორობა

უახლესი კვლევები AdNews-ისგან აჩვენებს, რომ ნებისმიერ ინდუსტრიაში ორი კომპანიის კოლაბორაცია 30-ჯერ უფრო იაფია, ვიდრე ციფრული რეკლამირება, რადგან ამგვარად კომპანიები უკვე არსებულ აუდიტორიაზე იღებენ წვდომას.

სილამაზის ინდუსტრიაში კი ეს ფაქტი განსაკუთრებით ჭეშმარიტია. საკმარისია მომხმარებლის წინაშე ახალი უნიკალური კოლაბორაცია წარსდგეს და სოციალური მედია პოსტებითა და განხილვებით ივსება, რომ აღარაფერი ვთქვათ პროდუქტების გაყიდვებზე.

კოლაბორაციას ამ ინდუსტრიაშიც უამრავი ბრენდი იყენებს. ამის ერთ-ერთ მაგალითად შეგვიძლია მოვიშველიოთ Hershey Corporation-ისა და კორეული სილამაზის ბრენდის - Etude House-ის თანამშრომლობა. მათ სურდათ, შეექმნათ პროდუქტი შოკოლადის ფილის თემატიკის გარშემო. პროდუქციის ხაზი მომხმარებელს სთავაზობდა თვალის ჩრდილების ორ პალიტრას. ერთ-ერთი მათგანი იყო Hershey-ის რძიანი შოკოლადის შეფუთვა, ხოლო მეორე შეფუთვა კრემიანი ორცხობილების იმიტაციას ახდენდა. უნიკალური პროდუქციის ხაზის გამოშვების წყალობით, კომმპანიამ ძალიან სწრაფად დაიმსახურა მომხმარებელთა სიმპათია და მათი გაყიდვებიც საოცრად გაიზარდა.

ასეთი ტრენდი 2020 წელს საკმაოდ გავრცელდა და 2021 წელსაც უკვე ხშირად გვხვდება თვალში. ამის მაგალითია კოკა-კოლას პარტნიორობა თვალის ჩრდილების გიგანტთან - Morphe. აღსანიშნავია, რომ ამგვარ ტენდენციას მხოლოდ მსხვილი ბრენდები არ მიჰყვებიან. ციფრული მარეტინგის გავრცელების ფონზე, ბრენდების კოლაბორაცია ინფლუენსერებთან ახალი და ეფექტური გზა გახდა რამდენიმე აუდიტორიის გასაერთიანებლად და გაყიდვების გასაზრდელად.

Colourpop ვიდეოების სერიას უშვებს იუთუბერ Kathleenlights-თან ერთად, რომელსაც 4 მილიონზე მეტი გამომწერი ჰყავს. მსხვილ და მიკრო ინფლუენსერებთან მუშაობის წყალობით კომპანიამ მოახერხა და მის პატარა ბრენდს საკმაო პოპულარობა შემატა და საკუთარი სოციუმის წრეც ჩამოაყალობა.

  1. ჰიპერ პერსონალიზებული კანის მოვლა

უახლესი კვლევების თანახმად, 18-64 წლამდე ადამიანებს შორის მომხმარებელთა უმრავლესობა დადებითად არის განწყობილი იმ კომპანიების მიმართ, რომლებიც პერსონალიზაციას მიმართავენ. მაგალითად, გამოკითხულთა 80% უფრო მეტად კავშირს ისეთ ბიზნესთან იჭერს, რომელიც მათ მათზე მორგებულ სერვისს სთავაზობს.

მომხმარებელთა ასეთი დამოკიდებულება ბრენდებისთვის სრულიად ახალ შესაძლებლობას და მიმართულებას ქმნის, რაც მათ ელექტრონული კომერციის აყვავებაში დაეხმარება.

2019 წლის მიწურულს ეს ტენდენცია უკვე შესამჩნევი იყო. კომპანია Neutrogena-მ შექმნა MaskiD – 3D პრინტ მიღაბი სპეციალურად მომხმარებლის კანის ტიპისთვის, რაც უამრავი მონაცემის შეგროვების შემდეგ გახდა შესაძლებელი. La Roche-Posay-მ კი შექმნა სპეციალური მოწყობილობა, რომელიც კანის pH დონეებს ზომავს და მომხმარებელს აპლიკაციის საშუალებით საჭირო პროდუქტებს უწერს.

სილამაზის ინდუსტრიაში არსებული მაღალი კონკურენციის გათვალისწინებით, პერსონალიზაცია და თითოეულ მომხმარებელზე ზრუნვა ბრენდებისთვის ეფექტურ გზას წარმოადგენს - იყვნენ გამორჩეულები. მომხმარებელს კი ამგვარი მიდგომა ეხმარება, მიიღოს გონივრული გადაწყვეტილება მისი მახასიათებლებისა და საჭიროებების მიხედვით. საბოლოო ჯამში კი ამ ყველაფერს ბრენდისთვის გაზრდილი ნდობა და განმეორებითი გაყიდვები მოაქვს.

 

ასევე დაგაინტერესებთ:

როგორ გამოვიყენოთ სოციალური მედია ელექტრონული კომერციისთვის

ტოპ 10 ციფრული მარკეტინგული სტრატეგია სილამაზის სალონისთვის

რა არის ინტერნეტ რეკლამირება? - განმარტებები და რჩევები